Abo sa lucha cu bo yiu tur anochi pa e drumi den su mes cama? Bo yiu sa subi den bo cama mei anochi sin kier bay bek den su cama? Bo no ta bo so! Tin hopi mucha di tur edad sa cu drumi cu nan mayor den nan cama, por lo menos parti di anochi. Dicon?
Estilo of custumber Tin mayor cu ta scoge pa nan yiu drumi hunto cu nan y esaki pa diferente motibo, por ehempel pa siguridad, preocupacion pa salud di e yiu, pa consuelo, pa coneccion cu e yiu of pa motibo cultural.
Pa nan e ta un estilo di bida. Pero mayoria bes esaki no ta loke e mayor ta desea sino un custumber cu nan a crea for di nacemento di e baby. No ta straño pa un mayor drumi hunto cu su baby recien naci, su baby prematuro of su baby cu ta sinti malo.
Specialmente ora bo ta cansa y/of ora bo ta duna pecho, ta mucho mas facil bo yiu drumi cu bo, cu cana bay bin entre bo cama y di dje. Pero maske con chikito e ta, e baby ta custuma lihe cu tur cos cu ta sinti dushi y tur custumber ta tuma tempo y esfuerso pa kibra.
Ademas, drumi hunto por tin consecuencia menos placentero y hasta peligroso, por ehempel: drumi malo pa motibo di falta di espacio riba cama of miedo pa drumi riba e baby, por pega e baby cu malesa, menos privacidad entre e pareha, chance cu e mucha ta mira actonan sexual (cu riba su mes ta abuso) y aumento di riesgo pa abuso sexual.
Aki ta sigi algun tips pa yuda bo yiu drumi den su propio cama:
* Cuminsa tempran. Custuma bo baby pa drumi den su cuna prome cu e por sali for di su cama y sigi bo. Si bo yiu sa cu e por “bishita bo” mei anochi, esaki lo bira un wega pe.
* Papia positivo. Bisa bo yiu: “Mucha grandi mag di drumi den nan mes cama henter anochi. Great no?” Esaki ta un tactica positivo mescos cu bisa: “Mucha cu ta bay creche mag di bisti panty/jockey” enbes di bisa “Baby so ta bisti pampers.”
* Usa un “night light” pa haci bo yiu su kamber un luga comfortabel pa drumi. Por pone musica suave, conta storia, lesa buki y papia di su kamber como un luga dushi y safe.
*Cambia bo manera di pone bo yiu drumi. Si bo yiu no ta drumi sin bo, haci cambio chikito. Cuminsa cu pone den su cuna, banda di bo cama. Si ta bo custumber pa drumi riba su cama cu ne te ora e pega soño, cuminsa sinta band’i dje, despues sinta riba un stoel y poco poco hala e stoel mas cerca di e porta.
*Tuma paso chikito. Si bo yiu a custuma pa drumi cu bo, no ta facil pa e drumi su so di un dia pa otro. Por lag’e drumi riba un cama banda di bo prome of lag’e keda 15 minuut cerca bo y despues bay den su propio cama.
*Sea consistente. E por ta duro pa bo keda hiba bo yiu bek den su cama mei anochi, specialmente si bo mester traha e siguiente dia. Pero pensa cu e no ta pa semper; despues di algun nochi dificil, bo yiu lo keda den su cama henter anochi.
*Hacie atractivo pa bo yiu. Por ehempel, si e keda den su cama henter anochi, e ta haya un sticker riba papel y despues di tres anochi, boso ta haci algo leuk hunto den weekend. Asina bo ta reta bo yiu pa haci esfuerso mientras e ta custuma pa drumi su so.
* Paga tino kico bo yiu ta wak na television of weganan di computer. Podise bo yiu no kier drumi su so, pa motibo di miedo. Durante dia ta facil pa wak un pelicula spantoso pero anochi e por haya miedo. Spiert’e of record’e di e consecuencia.
*No haci excepcion. Si bo yiu ta sinti malo of e no por drumi despues di un pelicula spantoso, bo por consol’e sin lag’e drumi cu bo. Corda cu abo tambe por keda cerca dje te ora e pega soño of e calma.
* Yuda bo yiu pa sa con pa cay soño bek. Bis’e pa keda riba su cama, cera wowo y pensa riba algo leuk cu e kier haci ora e haci aña.
Maske masha poco mucha ta keda drumi cu nan mayor te ora nan bira adolescente, ta den man di e mayor pa evita crea e custumber cu despues por bira un problema. Manera ta cu tur custumber, nan ta facil pa crea pero dificil pa kibra. Sinembargo cu bon boluntad, pasenshi y consistencia, pronto bo yiu lo custuma drumi den su propio cama.
Fuente website www.webmd.com “Parents, get your bed back”. Pa mas informacion of conseho riba educacion di mucha di 0 pa 12 aña, por tuma contacto cu Fundacion Pa Nos Muchanan na tel. 583-4247 of 588-0856, Email info@fpnm.aw of Website: www.fpnm.aw y tambe via Facebook. See Less
Leave a Reply