Aruba Excellence Foundation (A.E.F.) a habri aña cu un tremendo bon noticia. Durante un rueda di prensa, Sra. Esther Broeksema, Directora di A.E.F. y Sra, Anuesca Baly, Directora di S.K.O.A. a haci e gran anuncio publico cu Stichting Katholiek Onderwijs Aruba (S.K.O.A.) a compromete su mes pa certifica tur docente y staff participando den e programa di certificacion di ARUBA CERTIFICATION PROGRAM (A.C.P.).
E acuerdo firma entre A.E.F. y S.K.O.A. ta haci posibel cu tur empleado, pues docente como tambe cabesantenan di tur skol di S.K.O.A. y staff completo por tin e oportunidad pa siña mas tocante di Aruba su historia, naturalesa, cultura, turismo y tambe con pa brinda servicio excelente cu Zjeito.
Por conta cu un participacion di en total 690 persona!. E prome sesion virtual a inicia ariba dia 11 di Januari. Durante di un siman di tempo lo comparti informacion valioso cu e docentenan di 4 scol.
Cada luna lo tin un otro grupo cu lo participa cu e curso online y esaki lo continua te ora cu tur docente, cabesante y staff completo di S.K.O.A. wordo certifica.For di inicio cu esaki a wordo anuncia internamente na e scolnan, cuponan di registracion a yena masha liher.
Pues e interes di participacion ta hopi grandi. Asina cu cada docente completa e curso nan lo ricibi un certificacion digital cu tin un validez di 4 aña. Na momento cu tur docente, cabesante y staff di S.K.O.A ta certifica, lo ricibi e Recognition Award di ‘100% Aruba Certified.
Esaki ta e prome paso pa amplia e conocimento di maestronan ariba e concepto di “Zjeito” cual lo traspasa tambe pa nos muchanan. Cu e participacion di S.K.O.A. na e programa di certificacion A.C.P., Aruba Excellence Foundation ta continua cu e obhetivo pa sigi diversifica e sectornan di enfoke pa participacion.
E informacion brinda, ta informacion cu ta importante pa tur hende cu ta biba y traha ariba nos dushi isla. Brindando servicio cu Zjeito, pues cu amor, autenticidad, orguyo y amabilidad ta djis algun di e balornan cu ta ankra y conecta cu e manera autentico y cordial di brinda servicio na Aruba.
Esaki nunca mester bai perdi y pues ta importante pa tur hende ta consiente di esaki.A.E.F. ta extende su periodo di brinda e curso gratuitamente y ta facilita esaki online via e plataforma di Zoom.
Por registra via e website www.acp.aw of manda un email na info@acp.aw .Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.).
Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.
Leave a Reply