Esaki ta con cu hues a categoriza e suma di placa cu Aruba Airport Authority (AAA) a solicita Corte den Prome Instancia di Aruba pa duna su trahadornan pa kendenan disolucion di nan acuerdo laboral a wordo pidi.
E compensacion ta basa riba e Plan Social cual a wordo firma door di sindicato STA, kende ta un di e sindicatonan cu ta representa e trahadornan na aeropuerto, y gerencia di AAA.Sindicato FTA, kende ta representa e empleadonan di staff na AAA como tambe un grupo substancial di e trahadornan cu ta cai bou di CAO, tin sentimentonan mixto pa cu resultado di e caso.
FTA den nomber di su miembronan na prome lugar a pidi hues pa nenga e peticion di AAA pa asina e trahadornan en cuestion por mantene nan empleo y entrada, specialmente den e temponan dificil cu nos y isla y mundo henter ta pasando aden.
Esaki sinembargo a wordo nenga door di Corte. Hues den liñanan grandi a considera cu e decision pa cu e manera cu un empresa ta wordo organisa ta keda prerogativo di gerencia, unda cu ta keda na nan tambe pa determina si mester ahusta por ehempel e cantidad di cuponan di trabou pa por cumpli cu demanda.
E hecho cu e fluho di pasahero na aeropuerto a cai drasticamente a consecuencia di e pandemia actual y cu lo tuma un tempo largo prome cu esaki normaliza, ta hustifica un reduccion di personal, segun hues.
Interesante ta cu pa locual ta trata e instruccion di Minister di Turismo den nomber di Gobierno di Aruba pa para y reevalua e necesidad pa retira empleado na AAA, hues a considera cu Gobierno apesar di ta accionista unico, no tin e autoridad pa duna orden na gerencia di e N.V.
Un otro aspecto peculiar di e sentencia, ta e hecho cu den e caso aki huez a desvia di e liña di maneho cu e propio corte a bin ta aplica den varios decision recien, unda cu ta determina cu e tipo di peticionnan pa retiro aki preferiblemente mester wordo haci na Departamento di Labor y si haci esaki toch na corte, e caso lo por wordo wanta pa asina e procedura di Departamento di Labor wordo encamina.
Hues den su decision a considera cu ley no ta duna espacio pa duna un instruccion asina. Finalmente FTA y e empleadonan a haya razon pa cu nan ponencia cu e suma cu AAA a pidi Corte pa duna nan no ta husto.
E suma a wordo basa riba e Plan Social cu, apesar di hopi obhecion di parti di sindicato FTA, toch a wordo firma door di e otro sindicato (STA) y gerencia di aeropuerto. Huez den su decision a bai di acuerdo cu e pakete cu aeropuerto a pid’e pa duna e grupo aki no ta na su lugar.
Hues a considera cu aplicacion di e Plan Social pa cu e compensacion ta hiba na un ‘evident onbillijke resultaat’ (un resultado evidentemente inhusto) pa e trahadornan aki. Esaki a haci cu hues a aumenta tur e paketenan cu entre 30 cu 40%.
Como cu hues a desvia di e compensacion cu AAA a pidi, a base di ley e tin cu duna un plazo pa nan por considera di retira e peticion haci na corte. Den caso cu no haci tal e acuerdonan di trabou ta wordo disolvi entrante 9 di April 2020 na cual momento lo mester paga e empleadonan e compensacionnan ahusta manera antes menciona.
Leave a Reply