Colegio Hilario Angela den preparacion pa su Hofi Amistad

Hopi ta e scolnan cu ta interesa pa por tin un hofi pa asina nan por cultiva. Esaki tambe lo forma parti di nan les durante aña escolar. Eta un proyecto cu a cuminsa na 2019 y awe keto bai tin scolnan interesa den e proyecto aki.

Durante comienso di siman pasa e docentenan di Colegio Hilario Angela a hasi un bishita na nos departamento di Agricultura, Cria y Pesca Santa Rosa pa asina haya un presentacion di kico lo ta e tareanan basico di plantamento.

Esaki a wordo duna dor di nos colega sr. Ludwig Rasmijn pa asina e docentenan por pasa e conocemento aki pa nan alumnonan di Colegio Hilario Angela pa crea nan Hofi Amistad.

Tabata un dia completo di enrekese mas nan conocemento di tur locual ta ensera plantamento pa e docentenan cu sigur di nan parti a haya esaki hopi interesante. Ta den fin di e siman cu ta tras di lomba di parti Santa Rosa a hasi un bishita na e scol Colegio Hilario Angela pa duna un presentacion di plantamento basico na e alumnonan.

Aki sr. Ludwig Rasmijn y sr.Randy Maduro a percura pa e presentacion pa tur e klasnan di e scol. E muchanan a disfruta di esaki y tur mucha di e scol a ricibi nan pochi, gordura y simiya y a practica nan plantamento.

Awor nan ta bon prepara y tin conocemento con pa atente cu nan simiya y mata pa nan bai planta y crea nan Hofi Amistad. Riba e mainta aki minister encarga cu Sector Primario sr. Chris Romero tambe a hasi un bishita na e scol cu su persona mes a bishita den su hubentud cu ta Colegio Hilario Angela pa mira e desaroyo di e Hofi Amistad.

E cabesante di Colegio Hilario Angela sra. Cornelia Aventurin-Connor hunto cu docente sra. Shaneila Geerman cu ta encarga cu e projecto a ricibi minister Chris Romero pa asina por a mira e desaroyo y kico tur a wordo hasi y ta bai wordo hasi pa asina realisa e Hofi Amistad aki di dicho scol.

Despues minister Chris Romero a pasa den e klas cu tabata hayando e presentacion na e momento ey pa dirigi algun palabra di encurashamento na e alumnonan y felicitanan cu nan hofi cu pronto lo wordo finalisa.

Den nomber di minister sr. Chris Romero conhuntamente cu Santa Rosa ta desea e scol Colegio Hilario Angela hopi exito cu nan Hofi Amistad y pronto nos por mira nos muchanan por cosecha e fruto di nan Hofi. Pabien na Colegio Hilario Angela completo y su alumnonan cu e bunita proyecto aki.