Kids Corner y Biblioteca/Studieruimte di Fundacion Contra Violencia Relacional a bira realidad

Kids Corner y Biblioteca/Studieruimte di Fundacion Contra Violencia Relacional a bira realidad cu ayudo di studiantenan di IPA Fundacion Contra Violencia Relacional a habri su Kids Corner y Biblioteca/Studiekamer oficialmente pa e yiunan di e clientenan residencial.

Esaki tabata den colaboracion cu varios instancia cu a traha hunto pa realisa e projectonan aki cu un budget limita. Recientemente Drs. Emy Maduro a acerca e fundacion pa un stage pa studiantenan di IPA, unda coordinadora di FCVR, Sra. Magaly Maduro, a acepta mesora ya cu tabata tin un plan pa traha un huki sikiera den cual e muchanan cu yega na e shelter por hunga y distrai nan mes un rato durante nan estadia.

Mientras e studiantenan di IPA tabata trahando nan plan di accion y buscando materialnan na bon prijs nan a haya ayudo cu a haci nan trabou bira mas motiva. E tata di un di e studiantenan di IPA, Sr. Alwin Boekhoudt di Quick Electrical Services, a traha e casita di hunga pa asina corta e gastonan.

FCVR a ricibi hopi buki y co’i hunga for di Hulanda como donacion for di Sra. Mariette van Vught. E materialnan a wordo transporta pa FCVR cu ayudo di Vladimir di Caribe Intertrans cu a facilita esaki sin extra gastonan for di Hulanda.

Quota International of Aruba a colabora cu e financiamiento di e Kids Corner y semper ta haci donacion na FCVR di e popular beernan di Quota.4 studiante di tercer aña di IPA a traha riba e dos projectonan social aki. E Kids Corner tabata na encargo di Maryline Boekhoudt y Maryleine Gomez.

Y e Biblioteca tabata bou di encargo di Jowen Maduro y Rachela Dirksz. Nan begeleider tabata Mr. Maximo Wernet di IPA cu a duna nan evaluacion na final di nan presentacion.Presente na e ocasion aki tabata: representantenan di Directiva di FCVR, representantenan di Quota International of Aruba, y leidstersnan, funcionarionan y coordinadora di FCVR.