Cancion y video nobo di MTCHLL titula ‘Trigger’

Singer/songwriter Arubano MTCHLL ta lansa awe su siguiente single titula ‘Trigger’ hunto cu su video clip.E tema di e storia ta di dos persona cu ta envolvi cu otro cu pasion. Den es relacion tin un persona mas dominante cu e otro y e storia ta wordo conta for di e perspectiva di esun sumiso.

E persona ta sinti’e inclina pa duna tur di su mes na e otro cu e speranza cu un dia e relacion por converti den uno amoroso, sinembargo e ta realiza den mes momento cu e chispa entre nan ta uno puramente fisico y ta busca un escape di e hechizo mental.

E cancion ta wordo presenta cu su video cual a keda den man di Cocolishi Studios. MTCHLL hunto cu un tremendo team cu ta consisti di Brittney y Pierre Koolman y Chelsea Peterson a hinca e concepto den otro. Den un tempo record a logra realisa un production visual cu ta rico den color y mistica.

E intencion cu e video ta pa illustra un escena autentico Arubano cu tokenan moderno, a zorg pa uza mas elementonan crioyo posibel y a dun’e un storyline interesante y humoristico. Trigger ta e prome cancion cu MTCHLL ta lansa for di su propio portfolio como compositor.

E ta un di varios tema cu ta fruto di un colaboracion cu e producer talentoso Arubano Karixon kende tambe a keda encarga di e mixing y mastering di e cancion. Asina por spera mucho mas di MTCHLL den e genero urbano y cantando den diferente lenguahe manera Ingles, Spaño y nos dushi Papiamento/u.