FADA ta preocupa pa uso di substancia ilegal y legal

For di aña pasa FADA a cuminsa tuma nota cu den comunidad famia, mayornan y hobennan ta cuminsa pidi ayudo. Trahado preventivo, Rulienne Arends ta bisa cu mayornan ta yama FADA pa comparti nan preocupacion den nan famia.

Arends ta bisa cu for di ora cu scol a cera pa motibo di e pandemia Covid-19 nan a wak cu e uso den bario a cuminsa bin dilanti, e preocupacion di mayornan cu kier papia cu nan yiunan di e situacion aki.

“Nos a cuminsa wak e efecto di esey, nos ta wak mas hoben riba caya, nan ta wak cu hoben ta cuminsa cu nan amistad nobo, mayornan ta haya nan yiunan cu marihuana. Trauma di pasado cu ta keda afecta e hoben y no sa kico nan por haci”, e ta splica.

Di parti di FADA y CAA (Consultorio di Asuntonan di Addicion) nan ta purba di papia cu e mayornan y haci follow up cu nan. Pa asina por yuda e famia den e situacion cu ta pasando aden.

FADA semper ta para pa e parti preventivo, pa asina evita y yuda prome cu e hoben por cay den addicion of bay riba caya. “Tin di bisa cu for di algun tempo nos a vocifera nos preocupacion di uso di substancia ilegal y legal.”

E ta comparti cu nan parti di charla na scol ta pa asina por preveni cu situacion di abuso di substancia por yega leu. Sinembargo ora un hoben haci uso di substancia, Arends ta bisa cu tin hopi factor cu ta hunga un rol.

Por mira cu hoben ta admiti trauma cu nan tin for di chikito, nan ta kere cu uso di droga ta e solucion. CAA y FADA ta bisa cu ora di trata cu hoben asina, nan conhuntamente cu otro fundacion ta cay aden pa wak con por soluciona e omgeving cu e hoben tabata biba aden.

Leave a Reply

Your email address will not be published.