Sindicato S.P.A: Criminalidad ta halto y ta pidi mas ekipo pa por traha cune

Awe mainta sindicato SPA a bin dilanti hunto cu trahado di polis pa mustra nan mal contento den nan departamento. Sr. Joselito Dirksz, presidente di sindicato ta bisa cu no tin computer pa traha cune y por mira con tur trahado ta sinti nan mes cu stress halto.

Sr. Dirksz ta bisa cu recherche di districto Noord ta un di mas importante, mirando cu ta un districto mas grandi di Aruba y ta encera cu criminalidad ta basta halto den ultimo tempo. E ta bisa cu tin cantidad di trabou, casonan grandi y personal tin nan man yen pa motibo cu no tin ekipo suficiente pa traha cune.

E nivel di stress ta halto segun sr. Dirksz, anto tin cu deal cu mas casonan cu ta keda bin dilanti pa dia. Nan ta cansa di e situacion di papia tur caminda y gobierno no ta haci nada, awe e personal a bisa ‘ta basta’.

“Den ultimo tempo por a tuma nota cu tin tiramento, matamento di hende, bagabunderia cu droga. Tur esey ta refleha pa falta computer cu un polis no por sigui su trabou, te ora cu otro caba cu su trabou anto no por sigui cu nan trabou asina”, e ta expresa.

Nan a papia cu minister di husticia y nada no ta wordo haci, e ta bisa cu mester yega te na prensa pa asina pueblo por ripara kico ta pasando pa asina gobierno y esnan encarga por tuma accion.

Sr. Dirksz ta bisa cu personal ta ‘overwork’ y tambe hopi di e personal a haya covid-19, trahado ta cansa y fada di e situacion. “Nos a tuma accion pa asina pueblo por wak con e situacion ta”, e la splica. Nan kier atencion pa nan por haya nan ekipo cu nan mester.

Leave a Reply

Your email address will not be published.