Hubert Dirks presidente di FTA ta bisa cu a bin for di nan miembro cu gobierno lo a duna permsio na doño di edifcio pa habri casino pa cuminsa opera, pero un casino diferente, cu solamente machine y no live games, esey pa nan tabata preocupante.
Ta conoci cu den e mundo di casino ta pasando momentonan dificil y ta trece consecuencinan pa e trahado den e sector aki. E ta bisa cu nan a bay cerca minister concerni cu ta entrega permiso, sr. Andin Bikker pa trece claridad.
El a informa cu e permiso ta standard cu ta exigi cu mester cantidad di mesa wega live pa e casino por haya e permiso y cu no solamente lo opera cu machine ‘esey no ta e caso’. Sin embargo e preocupacion ta cu tin cantidad di casino cu ta bayendo malo.
Esey ta pone cu hende ta bay cas, ta keda sin trabou. E ta bisa cu ta di suma importancia pa ora un casino kier bin opera, despues di screening tambe mester exigi un suma di placa pa deposita na banco central, en caso cu crisis dal e compania, por lo menos e por paga salario pa trahado y belasting pa un periodo.
“E regla aki tin cu introduci pa asina evita cada trahado keda perhudica na final di dia, anto e compania ta bisa cu no tin placa pero e ta keda cu tur y get rid di trahado”, sr. Dirks ta expresa riba e punto aki.
E ta bisa cu esey mester bira un ley pa asina tur operador por cumpli cu exigencia aki. Nan a papia cu minister di husticia pa e cambio di ley y a keda di haya contesta.
Pa locual ta mundo di casino mes, sr. Dirks ta bisa cu cu tin demanda pa opera casino na Aruba, e interes ta keda habri. pero mester ehecuta y aplica nos leynan pa trahado y pueblo y tene control riba esaki.
Leave a Reply