Mark Solognier di Warda Costa, ta anuncia cu for di momento cu e gedoogbeleid a keda introduci pa tur piscado cu ta spearfishing, nan departamento a sigui cu nan trabou di control pa wak tur cos ta na ordo.
“En berdad nos ta ripara cu tiramento di pisca ta tumando luga, tiramento di pisca cerca hende cu no tin vergunning nos ta actua, of si nan tin vergunning y ta ripara cu cosnan no ta permiti, tambe ta actua con e reglanan di vergunning y ley ta bisa.”
Nan ta enfatisa pa tur piscado keda mantene nan mes na condicion di ley. Si nan ta wak cu e piscado ta den un area cu e sa cu e no mag di tira, nan ta actua. Tambe un punto cu ta wak hopi ta e fiamento di harpoen na otro persona, esey por trece consecuencia di perde harpoen, un vergunning ta personal.
Cada persona cu ta haya vergunning, tambe ta haya un mapa caminda ta indica cua ta e zona cu un piscado mag y no mag di tira, caminda cu ta drenta y sali for di lama. Cu exepcion di esnan cu ta sali for di boto.
Nan di Warda Costa lo actua basa riba ley, y lo cuminsa conscientisa e pueblo den e practica aki, y ministerio encarga lo mester duna informacion extra di con e ley ta hinca den otro. Ta pidi pa keda cu e bon comportacion y pa esnan cu cu mester regla su ekiponan pa bay Santa Rosa y cumpli cu tur regla ‘nos ta pidi pa haco tur cos legal pa tur cos cana netjes’.
“Una bes bo kibra regla, e ley ta conta pabo. E ora bo harpoen ta keda destrui y ta haya boet tambe cu nos mes ta duna. Nos ta keda controla e comportacion den lama y e uso persona di e harpoen (cu no mag di fia na otro).”
Leave a Reply