Pa tres dia (31 mei, 1 juni y 2 juni) lo tuma luga Aruba Investment Summit. E intencion pa e summit aki ta pa atrae inversionista local y den exterior pa inverti den e ‘promising sector’. Zulema Dabian Erasmus, hefe di departamento Economic Relations di Departamento Economico ta presenta riba e summit aki.
“Departamento di Asuntonan Economico, Comercio y Industria (DEACI) ta organisa ‘Aruba Investment Summit 2021’. E cumbre lo tuma luga virtualmente riba dialuna, 31 di mei, diamars 1 di juni y diaranson 2 di juni 2021. Esaki lo cuminsa pa 9 or di mainta y lo termina 12 ‘or y mey di merdia. Durante e cumbre lo tin oradornan internacional, tambe e miho lider-, ehecutivo- y comerciantenan local. E cumbre lo ta na ingles y participacion ta gratis.”
E programa di e prome dia lo presenta e maneho economico di cual nos promising sector ta sali afo. E di dos dia lo enfoca pa inversion na Aruba. Pa e di tres ta e logistica, energia renoba, research den desaroyo di agricultura. Tambe Aruba Aloe lo papia riba exportacion. “Aruba ta un luga pa un logro atractivo pa crea un economia con e finanzas lo bay tur hende por participa”, e ta comparti.
Durante e cumbre lo tin participacion di varios experto, lider, ehecutivo y comerciante di empresanan local lo comparti nan conocementonan tocante inversion na Aruba. Esunnan cu lo atende e cumbre aki tambe lo wordo inspira door di e orador principal, sr. Bradley J. Sugars, propietario, autor y business coach di e compania multi miyonario di ActionCOACH y CEO di mas di 9 compania.
E oradornan lo comparti nan conocemento tocante e creacion di un economia mas sostenibel pa nos pais Aruba mediante su Sectornan Prometedor y e oportunidadnan comercial cu esaki tin pa ofrece na inversionistanan local y di exterior.
Aruba Investment Summit 2021 tin como obhetivo pa atrae inversionistanan local y di exterior, poniendo Aruba den centro di atencion como un destinacion di inversion, enfocando riba e oportunidadnan comercial den e Sectornan Prometedor di Aruba. Esunnan cu lo atende lo haya un conocemento profundo di e proyectonan di inversion na Aruba, posibilidadnan, testimonionan, contactonan valioso.
Durante ‘Aruba Investment Summit 2021’, tur cu lo atende lo siña tur e ‘ins and outs’ tocante con pa haci negoshi na Aruba, e Sectornan Prometedor y e oportunidadnan comercial cu nos pais tin disponibel. Por registra via https://hopin.com/events/aruba-investment-summit-2021.
Leave a Reply