Cuerpo Policial ta pidi pa cada partido politico mantene mes na regla y medida ora di campaña

Sr. Lito Lacle, vocero di KPA ta bisa cu cada tres dia, minister di asunto social, minister di husticia y minister di salud ta cambia e ministeriele regeling, esaki ta un orden cu KPA tin cu cumpli cune.

Te ainda tur regla ta mescos caminda medida ta pa evita aglomeracion, mantene distancia social, no para mas cu tres persona hunto den un luga, evita bishita den cas.

Sinembargo e ta bisa cu cada persona por intepreta esaki na nan manera. Nan ta haya e medidanan aki y mester keda controla, conhuntamente cu otro stakeholders pa tene nan mes na esaki.

Cuerpo policial a tene reunion cu tur 10 partido pa asina nan splica e reglanan aki y pa tin tur cos mas duidelijk pa nan por adapta y traha cu esaki. Nan ta keda in contacto cu cualkier pregunta cu nan kier haci of con mester traha cu e ministeriele regeling.

Si di parti di KPA, nan detecta algo, manera un bishita na cas cu mas hende, of no ta cumpli cu regla, mesora nan ta tuma contacto cu nan pa asina e partido politico por papia cu e persona cu no ta cumpliendo, esey tambe ta a base di prueba manera video of cualkier potret cu ta yega na KPA.

Sr. Lacle ta bisa cu falta di medida y regla por ta castigabel, y no solamente e ta trece consecuencia pero e ta pa preveni cu mas contagio di covid-19 den comunidad, y KPA tin cu tene nan mes na locual e mandatario a pone den e ministeriele regeling.

Un otro cos cu sr. Lacle ta menciona ta cu si bira asina mas erg, mester tene na cuenta cu 25 juni ta cerca, y si hende keda infecta nan mes, no lo por bay vota. “E ta keda na cada partido pa mantene nan mes na regla. Nos ta haya opdracht pa cumpli cune.”

Leave a Reply

Your email address will not be published.