Sindicato SADA ta reacciona riba decision di hues di caso WEB y SIWA

Presidente di Sindicato SADA, sr. Edward Maduro ta duna nan punto di bista di locual a tuma luga den corte cu sindicato SIWA, caminda e decision ta bin cu preocupacion pa tur sindicato na Aruba. Den un situacion caminda un CAO ta wordo kibra.

“Nos ta compronde cu nos ta den tempo di crisis pero un CAO (contracto collectivo) ta sagrado y mester tin participacion di tur partido, trahado, sindicato y dunado di trabou”, sr. Maduro ta splica.

Al contrario cu ambtenaar, nan no tin CAO pero nan tin ley, anto nan preocupacion ta cu gobierno lo sigui corta den nan salario sin avisa sindicato cu Hulanda su condicion riba mesa.

E ta menciona cu for di 20 april 2020 a informa sindicato cu lo corta den salario pero ningun momento a delibera cu sindicato pa wak unda ta miho pa corta. E ley aki a wordo pasa parlamento.

“Nos sa cu parlamento no ta bay en contra di gobierno. Parlamento cu ta e organo mas halto na Aruba cu mester ta esun cu ta manda riba gobierno, nos ta wak cu pa ultimo decadanan no ta haci nan trabou den e parti di controla y vocifera pa pueblo”, e ta expresa.

E ta duna ehempel cu si gobierno pa dia di mañan kier kita 25% di trahado, nan pasa e ley e ora parlamento ta bay acuerdo. E ta bisa cu ta para zwak y vulnerabel den e situacion dificil di crisis ‘esaki no ta duna derecho pa trapa riba trahado’.

Segun sr. Maduro ta bisa ta situacion cu ta afecta e comerciante, e dunado di trabou, cu ta duna trahado no gana di traha pasobra ningun hende ta tende nan. E ta bisa situacion asina mester ta un acuerdo mutuo.

Sr. Maduro tambe ta splica tocante awo cu gobierno a habri vacature pa trahado. Esey ta un discusion cu tabatin na 2019 tocante indexering y cu a menciona den pasado e tema di tuma hende nobo.

Locual e ta bisa cu ta algo contradictorio pa motibo cu a anuncia cu tur departamento tin tekort na personal, y esnan cu tin ta haci mas usso di overtime ‘ta conoci di yen buraco den diensten’ anto kier kita den salario pero mester personal pa tekort.

E ta bisa cu esey ta pasa awo cu ta den temporada di campaña y eleccion pa asina wak movecion. Sr. Maduro a bisa cu lo tin reunion cu nan miembronan pa haci wak kico ta bay delibera y haci.