Ruben Geerman, un ciudadano a keda sumamente disgusta cu locual autoridad a haci riba su priopiedad di criadero di bestia na San Nicolas. Geerman ta bisa cu no ta prome biaha e sucede, den su ora di trabou, anto ta laga su yiu encarga na e sitio.
“Polisnan a yega y sin ningun ordo a haci uzo di un mashin pa destrui e curanan di porco”, e ta bisa. E ta lamenta esaki pasobra e por corda hopi bon cu nan a yega di horta su bestianan y a haci di denuncia, pero nunca a haci nada p’e.
Den oranan di merdia el a haya yamada di un funcionario policial, kende a puntr’e si e ta cria porco. A bis’e cu tin porco morto, siendo cu ora el a bay tur tabata bon. E porco morto no tabata cos di e dia ey, pero algun dia prome.
Nan a informa cu ta bay confisca tur e porconan. Awo e tristo ta cu e polis a bisa su yiu, drecha e luga y lo haya e bestianan bek. E luga, el a splica, cu e dak ta di material duro. Y hasta a bisa, cu no por cria bestia mas.
“Ta hopi placa a gasta den material pa traha e luga, cu tin porta di hero y cura di bloki. Anochi ora cu mi a yega su cas, a mira cu enberdad nan a bay cu su porconan”, el a splica, cu ora e porconan ta bay haya yiu, ta saca nan for di cura.
E ta lamenta cu Polis a tuma e decision ey, pasobra nan no sa nada di cria. Si ta personal di Santa Rosa a bini, lo por a bisa cu e porconan ta bon cria y ta bon gordo. E porconan confisca na final, e ta kere, ta bay pa trahadonan di abattoir mes of amigonan.
E no por compronde di con ta kibra e luga y ta bisa nan trah’e di nobo pa haya e bestianan. Criamento ta algo cu nan ta haci di tempo di su tata. E ta haya inhusto y e lo cana e caminda pa mira kende ta para responsabel pa e destruccion.
Leave a Reply