Sindicato STA: Gobierno nobo tin cu controla prijs di cuminda

Presidente di Sindicato STA, Diego De Cuba ta pone enfasis cu gobierno nobo mester controla prijs di cuminda, e fundacion CAS. E ta menciona cu nan mester reactiva e fundacion CAS pero pa haya subsidio necesario pa haci trabou na bienestar di consumidornan.

Actualmente tin un canasta basico cierto cantidad di productonan, cual ta e uniconan cu ta wordo controla. De Cuba a bisa cu mirando e situacion na Aruba, mester tin control riba tur producto, pasobra e comercio liber ta causa e variacion grandi di prijs.

Pero ningun ciudadano tin e chens awo di core rond y wak unda tin e miho prijsnan. Mester tin control di prijs riba tur producto y ‘un control pisa’. Awo ta e consumidor ta esun cu ta sinti e golpi constantemente. E situacion actual ta cu si tin aumento di utilidad, ta e consumidor tin cu bay paga pa esaki cu aumento di prijsnan.

Pa e motibo aki, e control mester bira mas severo. E mensahe pa e proximo gobierno ta cu mester bini cu e controlnan y implementa e leynan manera debe ser. Awo tin leynan cu contenido tremendo, pero no ta ehecuta esaki.

“Nos a ripara pa hopi tempo caba cu e situacion t’asina. E ta desastroso pa e consumidor cu tin un entrada limita y ta cosnan cu por cambia,” De Cuba a bisa. E ta hopi positivo cu crecemento economico, mirando cu turismo a bin ta aumentando y e generacion di placa lo ta miho.

Pero mester bini cu otro companianan pa diversifica e economia y evita e problema cu a pasa aden cada biaha cu turismo haya un golpi. E ta contento cu e maneho sublime cu tabatin pa cu COVID y ta conseha pa sigui cuida curpa pasobra ainda no tin e virus aki completamente domina.

Leave a Reply

Your email address will not be published.