Presidente di KWF: Den 2020 no a recauda ningun tipo di fondo pero a inverti 118 mil florin den servicio di cuido na cas

Presidente di Koningin Wilhelmina Fonds Aruba, sra. Lilian Prins a duna un relato financiero di aña 2020 y a trece dilanti cu den 2020 e fundacion no por a recauda niun tipo di fondo debi na e pandemia.

“Esaki ta prome biaha cu algo asina ta sosode den e 59 añanan di existencia di e fundacion. Asina mes Koningin Wilhelmina Fonds a sigui duna su servicionan normal, mientras cu tur otro instancia a stop. Covid a drenta pero cancer a sigui su rumbo”, e ta bisa.

Pa aña 2020 ta mustra cu e fundacion a ricibi 60% menos entrada compara cu 2019. Tambe e fundacion tabatn 36% menos gasto cu e aña anterior pero si 200% mas gasto cu a ricibi na entrada y e gasto mas grandi ta bin di e parti di cuido na cas. Thuiszorg ta forma 62% di tur gasto.

Despues ta bin e gastonan di oficina cu ta 12%. Lite Life ta 10% di tur e gastonan y articulonan di masectomia ta 4.2% di tur gasto. Gasto di cuido na cas ta keda halto paso e fundacion ta hinca hopi ora den e parti di asistencia na cas.

Aña pasa a inverti Awg. 117.193,94 cual ta ensera casi 5412 ora di trabou. Esaki ta servicio di cuido na cas den siman, den weekend y riba dianan di fiesta. Mester tene cuenta cu e enfermeranan cu ta traha cu Koningin Wilhelmina Fonds ta traha como freelancers y ta traha ora tin pashent, pero na e momentonan aki tin pashent constantemente.

E suma cu ta paga e enfermeranan ta den siman Awg. 20, den weekend Awg. 30 y riba dianan di fiesta ta paga Awg. 40 pa ora. Mester tene cuenta cu den un aña ta 6 luna tin sin dianan di fiesta y 6 luna cu diferente dianan di fiesta, esta di december te cu mei. Lunanan cu ta cay e fundacion pisa. 

Sra Lilly Prins ta contento cu e fundacion a sa di coba dam y warda awa y asina por a carga e lunanan tras di lomba. Pero awor cos ta birando dificil y ta importante pa cuminsa recauda fondo.

Si esey no sucede, sra. Prins ta bisa cu e prome yudansa cu nan lo mester stop cune ta esun di duna nan servicio na cas, mirando cu esey ta esun cu ta tuma mas gasto di e fundacion.

E fundacion a manda carta pa autoridadnan concerni y ta wardando si lo haya aprobacion pa colecta riba caya manera ta e custumber anualmente den lunanan di april y mei. Awor aki a jega e momento pa cuminsa recauda fondo pa asina sigui brinda comunidad e ayudo cu nan ta pidi.

Pa ciudadanonan cu kier haci un doncion na Koningin Wilhelmina Fonds, por haci esaki online via nan banco faborito y tambe via Pay.aw. E cuentanan bancario ta: Aruba bank 261145450190, Banco di Caribe 80710901 y CMB 11203970


Leave a Reply

Your email address will not be published.