Francia lo pone restriccion pa biahero di India

Francia lo impone restriccion di entrada na biahero di India pa asina combati un variante contagioso di coronavirus yega na e pais. Restriccion tambe pa pais manera Brasil, Argentina, Chile y Sudáfrica.

Vocero di gobierno, Gabriel Attal, tambe a confirma cu Francia lo hisa nan prohibicion di biahe nacional pa 3 di mei, pero lo mantene toque de queda for di 7pm te cu 6am. Tiendanan no esencial lo habri bek pa mita di luna di mei.

Francia a suspende tur vuelo for di Brasil na cuminsamento di luna, un esfuerso pa stop propagacion di e variante nobo cu ta den e pais di zuid america. E medida temporal ta reemplasa pa restriccion estricto di biahe na e cinco pais, inluyendo un cuarentena obligatorio di 10 dia y control di polis pa garantisa cu persona cu yega Francia ta cumpli cu rekisito.

Tambe ta exigi test mas stricto pa coronavirus na viahero di e paisnan cu lo mester bin cu test antigeno obligatorio na yegada y un test PCR prome cu subi avion. E variante identifica pa prome biaha na Inglatera ta responsabel di e 80% di caso di virus na Francia.

E variante di Brasil y Zuid Africa ta representa e 4% di infeccion di Francia, asina a anuncia minister di salud, Olivier Veran. Attal a bisa cu infeccion diario ta baha den e pais pero ta yega mas di 30.000 persona pa dia cu casi 600 pashent cu covid-19 na ICU y hospital ta cerca di nan capacidad.

“Epidemia ta disminui mas slow cu na november, specialmente cu viariante ingles. E presion di hospital ta extremadamente fuerte”, Attal a bisa.

Scolnan creche y primaria lo habri bek 26 di april despues cu a cera pa tres siman segun a planea. E scolnan secundario lo habri bek 3 di mei. Francia tin intencion di habri gradualmente tienda no esencial, algun di nan luga cultural, terazza y restaurant pa mei.

President Emmanuel Macron a elogia e aceleracion di campaña di vacunacion na e pais, cu mas di 2.5 miyon di inyeccion usa pa siman pasa. Francia a informa mas di 100.000 morto durante pandemia di covid-19.

Leave a Reply

Your email address will not be published.