E president di Colombia, Ivan Duque ta anuncia varios medida di prevencion contra covid-19, manera toque de queda, cu lo aplica durante proximo dianan, incluyendo Semana Santa, na municipio unda ocupacion ta cama di ICU ta mas cu 50% y 70%.
“Pico y cedula na municipio unda cu ocupacion di ICU ta mas cu 70%. E medida preventivo y necesario pa nos no biba den e siguiente simannan di luna di april of mei na un di tres pico severo”, e mandatario a bisa for di Bogota.
Pico y cedula ta e restriccion di desplazamento di e poblacion determina pa e datum y e ultimo number di e ID (cedula di identificacion).
Duque a indica cu lo aplica restriccion di movilidad for di 10:00pm te cu 5:00am na e municipio caminda e ocupacion di ICU ta mas ariba cu 70%. Na luga cu e 50% di ocupacion, e restriccion lo bay di 12:00am te cu 5:00am.
E medida lo ta den vigor for di 26 te cu 29 di maart y 31 di maart te cu 5 di april, asina e mandatario a splica. “E medida di caracter preventivo ta necesario. Y tambe ta permiti no sacrifica e avance di reactivacion di e pais, pero pa tuma medida cu lo permiti no wak un aumento dramatico di ocupacion den e proximo simannan”, el a bisa.
Segun ministerio di salud di Colombia, te cu 22 di maart, Cali tin 77% di nan cama di ICU ocupa: Bogota e 59% y Medellin e 75%. Colombia ta raporta 2.347.224 caso di covid-19 y 62.274 persona fayecido.
Leave a Reply