Funcionario di ONU ta condena e hunta di Myanmar despues di cu mas di 100 civil a keda asesina den un dia

Dos funcionario di ONU a condena e hunta militar di Myanmar na raiz di protesta contra e golpe militar cu a derota e gobierno electo di e pais. Un 114 persona a fayece durante manifestacion na 44 pueblo y ciudad rond di e pais.

Den un declaracion, Alice Wairimu Nderitu, asesora special di ONU pa prevencion di genocidio y Michelle Bachelet, alto comisionado di Nacionnan Uni pa derecho humano a insta forsa arma di Myanmar pa stop di mata hende, na e mesun persona cu nan mester proteha.

Funcionarionan tambe a condena e atake generalisa, letal y sistematico di e forsanan armada di Myanmar contra manifestante pacifico, manera otro violacion grave di derechonan humano for di momento cu a tuma poder dia 1 februari 2021.

E relator special di ONU pa Myanmar a bisa cu ehercito ta ‘asesinando den gran cantidad’ y a pidi mundo pa nan aparta di e hunta y stop acceso na armanan. Segun e ultimo recuento di Asociacion di asistencia pa presonan politico a bisa cu 423 persona a fayece na Myanmar for di e golpi militar.

Den esnan cu a fayece tin 6 mucha entre 10 cu 16 aña. A pesar di accion y asesinato di hende, algun manifestante a bolbe bay manifesta contra e forsanan arma di Myanmar. Residentenan a bisa cu forsa militar ta tirando indiscriminadamente na Yangon matando hende y otro hende muhe a fayece na Ywa, centro di Myanmar.