Durante conferencia di prensa di fraccion di AVP, Parlamentario drs. Mervin Wyatt-Ras, a expresa cu awendia nos hendenan a bira mas pober. Dor di COVID, un cantidad grandi di cuidadano a perde trabou, e famianan aki no tin pan pa pone ariba mesa di nan yiunan.
Nan no por paga cas, ni awa, coriente y impuesto. Tampoco nan por paga nan quota di auto, ni skol pa yiunan. Esaki ta un situacion hopi preocupante den nos comunidad.
E poder di compra di nos cuidadanonan a baha ya caba prome cu COVID. Desde aña 2018 caba Banco Central a indica esaki na momento cu a cuminisa kita personanan for di trabou y negoshinan a cuminsa baha e cantidad di personal pa motibo cu gastonan di haci negoshi a subi.
Na e momento ey nos partido pa medio di nos lider a bati alarma caba, sinembargo niun hende a duna oido. Esaki ta netamente loke ta pasando na Aruba. E falta di poder di compra a inicia ya caba di basta tempo ora e gobierno aki a bin cu medidanan.
Un di nan ta ora e minister di Finanzas, Maduro, a hisa BBO y a kita e BBO for di recibonan cu e cliente ta ricibi. E falta di transparencia aki a haci cu comerciantenan por pone cualke prijs sin cu cuidadanonan por critica of reclama kico ta pone.
Pues e control ariba recibo no tey mas manera e tabata antes. Nos pueblo no por ta critico mas paso e no sa cuanto BBO e ta paga. Eynan a cuminsa cu e proceso unda nos hendenan a perde gara ariba loke nan ta paga. Ademas prijsnan a subi drastico.
Esaki no ta un situacion bon pa nos ciudadanonan, y ta hopi preocupante, segun e parlamentario ta indica. El a haci un apelacion riba e ministernan di Asuntonan Social, Croes, y esun encarga cu Asuntonan General, Wever-Croes, pa haci algo na e pobresa aki. E minister di Finanzas na momento cu e mester a yuda pueblo di Aruba ela a introduci medidanan.
E parlamentario ta sigui bisa cu gobierno a bin cu FASE, sinembargo FASE a resulta di ta un farce, paso hopi di nos cuidadanonan desemplea cu a kere cu nan lo haya un suma di emergencia y yudansa dor cu nan a perde trabou, no a haya esaki of mester a pasa un caminda di cruz pa bin na remarca, mientras otronan si ta hay’e mesora.
Tin un cantidad di personanan cu no a haya FASE, ni a haya pakete di cuminda, ni a haya ayudo di Rode Kruis. Den e crisis berdadero aki gobierno a dicidi di bandona trabou y retira. Nan a planea esaki pa nan bai campaña.
Awor den campaña si por mira cu e minister di Asuntonan Social, Croes, ta parti basket cu productonan ‘expired’ pa asina haci comosifiera cu e ta duna pueblo cuminda. Si minister realmente kier yuda pueblo cu no tin cuminida, e ayudo aki mister ta uno structural.
E ayudo aki mester ta un pakete di cuminda cu ta wanta pa un luna of un siman sikiera y e ayudo aki mester ta trabou. E minister awor ta haci comosifuera e ta bai salba nos pueblo cu paketenan. E situacion aki ta inacceptabel.
Nos fraccion y partido ta sigui e desaroyo aki di serca y siguramente nos partido lo haci lo posibel pa rescata nos pais di e gobernantenan aki. Wyatt-Ras ta finalisa bisando cu su compromiso ta cu nos pueblo pa den e proximo gobernacion atende debidamente cu e asunto aki y haci posibel cu nos hendenan ta haya bek prosperidad den nan hogar y logra tambe cu tin empleo, paso e gobierno aki enbes cu e ta yuda nos hendenan haya empleo e no ta haciendo nada.
Tambe lo stimula esnan cu kier lanta nan propio negoshi. Esaki ta un reto pero alabes un compromiso cu tin cu nos pueblo pa logra trece trankilidad y bienestar den nos pais.
Leave a Reply