Cultivando Tour repartiendo simia y solucion den bario
Cu menos cu dos luna prome cu eleccion 2021, plataforma RAiZ ta subi bicicleta y trapa bay pa yega den tur bario na Aruba. No cu bandera, no cu sticker, no cu borchi gigante na cada skina, ni speaker cu ta bati henter dia bay.
No cu placa ni cu fabor pa cumpra voto, pero exactamente manera RAiZ a campaña na 2017—cu simia y solucion pa nos hendenan mes planta locual cu nos tur kier cosecha: un mihor futuro pa henter nos isla.
Durante eleccion 2017 ya plataforma RAiZ a demostra cu partidonan no mester di capitalnan astronomico pa comunica nan mensahe. Cu e tecnologia y e medionan actual por logra gran parti di e obhetivo.
Claro cu e contacto directo cu e votador ta keda crucial, pero manera e dicho ta bisa: tin hopi caminda pa yega Roma. Y RAiZ sigur a percura pa explora y implementa strategianan nobo den politica manera union, respet mutuo, madurez politico — durante nan campaña riba rednan social como tambe nan encuentronan den bario.
Awe nos ta bibando den un epoca di pandemia cu tur su retonan, pero tambe cu oportunidad pa avansa, pa eleva nos mes como ser humano. Plataforma RAiZ ta creciendo, birando mas fuerte, y lo sigui plama su simianan rond di Aruba.
Pero pa planta nos mester di tera fertil. Mester larga e tera, mester fertilis’e, muh’e y ora di planta e simia, nos no por bira lomba bay. Pa e mata crece bira fuerte, pa e por duna su fruta, mester cuid’e bon.
Cada ciudadano riba nos isla tin su simia, awor kico pa haci cu ne ta un cuestion di balor. Kico ami, abo, nos por haci pa nos pais? E solucionnan ta den nos propio man, planta nan, pero den bon tera.
Leave a Reply