Ya durante e programa Conecta cu Nos – Bachi un Banda – di Fraccion di MEP cu a pasa riba Facebook dia 25 di maart 2021 mi a informa di mi decision di no produci material personal nobo pa e campaña aki.
Un decision cu ami tabatin cla tuma asina cu e keda anuncia cu lo disolve Parlamento y lo yama eleccion mas trempan. Un decision cu mi ta haya logico y cu tabata hopi facil pa tuma. Pakico mi no lo tin material nobo?
Mediante e comunicado aki mi kier splica e motibo di mi decision pasobra mi ta keda acerca pa material door di votadornan. Aruba ta den un pandemia cu a pone hopi famia den un situacion hopi delicado y fastioso.
Hopi mama y tata di famia a perde trabou of parti di nan entrada. No ta pasa un dia cu nos como politiconan y pueblo mes ta comenta di e situacion cu nos ta aden. Cifranan sigur ta demostra esaki caminda ainda tin casi 4000 persona ta ricibi FASE, alrededor di 20.000 hende ta ricibi subsidio di salario y más cu 25.000 hende ta depende di bon of pakete di cuminda.
Pues na mi opinion awor no ta e momento pa hinca placa den cosnan innecesario y sin ningun balor pa nos pueblo. Mi ta prefera di sigui ta solidario y sigui yuda esnan den necesidad unda cu mi por.
Algo cu mi a bin ta haci prome y durante di pandemia.Ban reuza y reciclaPesey mes mi ta carga e campaña di nos partido pa reuza y recicla. Partido lo bay produci algun material no costoso cu candidatonan por duna esnan cu ta desea y ta keda na cada candidato pa dicidi pa nan mes encuanto material personal.
Mi ta convenci cu hopi hende tin den nan cashi, algo di MEP warda, y si esey no ta e caso, chens ta grandi cu lo tin algo geel y cora pa por mustra color y sosten (si asina ta desea). Ban uza nos creatividad. Na final… GEEL y CORA e mester ta! Hunto nos ta avansa y trahando hunto nos ta logra mas.
Leave a Reply