Daphne Lejuez: ‘Modernisacion di nos Parlamento ta esencial pa cumpli cu principionan di bon gobernacion’

Accion21 su vision ta inclui desaroyo di un gobierno sostenibel, responsabel y confiabel, den cual cada cuidadano por deposita su confiansa, y segun candidato number 2 riba lista di Accion21, ta sumamente importante pa modernisa nos parlamento pa cumpli cu tur principionan di bon gobernacion pa futuro generacionnan.

Introduccion di ReferendumComo un Partido Liberal progressivo, Accion21 ta kere firmemente den fortificacion di nos estado di Derecho incluyendo participacion di nos cuidadania.

“P’esey nos ta kere den introduci un sistema unda pa Ley Parlamento di Aruba por yama un Referendum mediante un Landsverordening pa asina pueblo por tin participacion den cuestionan importante pa Aruba,” segun sra. Lejuez.

Na momento cu surgi un crisis den gobierno un Prome Minister tin e autoridad pa manda su gobierno cas y disolve Parlamento sin prome consulta cu Parlamento. Pa percura cu no tin abuso di e oportunidad aki segun sra. Lejuez, e ta subraya cu ta importante pa amplia e posibilidad na unda cu Prome Minister por haci uso di e provision aki den ley solamente si tin aprobacion di un 2/3 parti di Parlamento.

Esaki lo percura pa tin continuidad parlamentario y unda cu un zakenkabinet temporario por keda instala pa finalisa e termino, den caso cu no logra yega na otro. Introduci un Ley Temporal pa Efectonan di Covid Lejuez: “E ta importante pa subraya cu e efectonan di Covid riba nos comunidad y riba mundo lo keda sinti pa un temporada largo.

Pa e motibo aki ta importante pa gobierno di Aruba no sigui usa e Ley di Calamidad pa sigui maneha e crisis aki lagando Parlamento un banda y di e forma aki ta mina nos estado di derecho.”

P’esey Accion21 ta kere den introduccion di un ley special, cual segun sra. Lejuez esaki ta regla e parti di e balans entre libertadnan cu cuidadanonan tin y na ki momento gobierno por limita esaki.

“E parti esencial di un ley asina ta cu nan momento cu tin un situacion andando no premira, mester consulta cu Parlamento di Aruba. Esaki no a keda haci pa e ultimo 12 lunanan unda cu pueblo su representantenan no tabata tin nada di bisa den e maneho di e Pais durante e pandemia,” sra. Lejuez ta expresa.

Introduccion di un Autoridad pa Maneha Mercadonan Financiero (AFM)Sra. Lejuez ta conclui cu e meta primordial ta pa proteha e consumidornan y tin un miho control di e servicionan comercial di institutonan financiero.

“E lo bira un instituto independiente,” e ta bisa, “y su miembronan lo keda nombra door di Conseho independiente di Pais Aruba of Gemeenschappelijk Hof pa percura cu tin obhetividad den nan control.”

Esakinan ta apenas algun cambio segun sra. Lejuez, di cual sigur lo encontra mas procesonan cu mester keda modernisa y adapta pa asina sigura cu ta cumpli cu e principionan di bon gobernacion.Daphne Lejuez, nr 2, Accion21

Leave a Reply

Your email address will not be published.