Enseñansa y Turismo den su curason: Jennifer Arends-Reyes ta conta cu bo sosten!

Nos ta den e siman culminante pa cu eleccion 2021. Aruba lo bai eherce e derecho di voto diabierna awor. Un eleccion cu lo defini e rumbo di nos pais, e rumbo nobo pa cu Enseñansa y Turismo.

Jennifer Arends-Reyes a sa di hiba un campaña cu contenido y honesto sin ofrece fabornan politico pero cu e compromiso pa ta traha pa Aruba y ta bo voz. For di 2013 Arends-Reyes ta den parlamento y tin tur e hermentnan pa continua cu su trabao y mas!

Clausurando su campaña, Jennifer kier a yama danki na cada un persona cu a habri nan cas dia tras dia pa ricibi Jennifer y su ekipo y di por a scucha e plan di rescate di partido AVP y e compromiso di Jennifer en especial pa cu Enseñansa y Turismo.

Jennifer a sa di drenta den e comunidad tur dia conhuntamente cu su ekipo. A scucha e grito, a mira e situacion y awor mas cu nunca ta para cla pa rescata Aruba y reconstrui nos pais.

Un candidata di tur hende cu a wordo grandemente acepta den comunidad, no solamente pa nos Rubianonan pero tambe pa e comunidad entre otro Filipino, Haitiano y Latino, e ultimonan aki a wordo grandemente neglisha y lubida pa Gobierno actual.

Den e siman tras di lomba partido AVP a reuni cu e comunidad nan aki y a scucha nan preocupacion pa Aruba, un pais cu nan ta yama cas! Un pais cu a habri porta pa nan y cu nan yiunan por tabata tin un mihor futuro.

Turismo ta serca di Jennifer su curason, un sector grandi cu hopi di nos hendenan ta labora aden y contribui na nos economia. Un sector multicultural cu mas di 60 nacionalidad ta traha duro pa hiba Aruba dilanti.

Un sector cu Jennifer kier brinda lo mihor pa esnan trahando aden pa elimina e descriminacion laboral y crea mas union y igualdad. Aruba merece un pilar economico fuerte, uno cu por contra tur crisis sin cu mester sacrifica nos hendenan, abo merece un Aruba sigur y prospero.

Como docente di profesion, Jennifer kier mehora tambe nos Enseñansa. Nos muchanan, hobennan y maestronan a wordo poni un banda pa 3 aña y mei y ainda no tin un siguransa den e sector aki.

Nos muchanan y hobennan mester e siguransa pa un mihor futuro y nos maestronan mester e trankilidad mental pa sigui guia y educa nos yiunan. Cu bo voto pa Jennifer esaki ta posibel.

Di curason Jennifer ta pidibo pa para keto un rato, mira rondo di bo y puntra bo mes si di berdad locual bo ta mirando ta locual bo kier pa e proximo 4 añanan nos dilanti of bo kier un mehoracion, bo kier stabilidad y crecemento.

Aruba mester dibo, Jennifer ta pidi bo sosten y voto. Ban hunto y eherce bo derecho di voto, un derecho cu ningun hende mester cumpra of priminti promesanan falso sin por cumpli. Partido AVP tin e plan di rescate, Jennifer tin e hermentnan, e unico cu falta ta bo sosten na #11 T’esun.

Leave a Reply

Your email address will not be published.