Maneho di desperdicio responsabel: Sera Parkietenbos y renoba RWZI

Pa por logra un mihor solucion pa desperdicio mester bai pensa den termino di economia circular. Esaki kiermen cu lo mester evalua e tipo di desperdicio cu ta wordo produci y con esaki por wordo sea recicla, re-usa of reduci. E cuidadano, pero sigur e sector comercial, tin nan responsabilidad den esaki pa por yega na solucionan duradero.

SERA PARKIETENBOS Y ENFOCA RIBA REDUCI, RE-USA Y RECICLA

Sera Parkietenbos y “cap” (cubri permanentemente) e area pa asina por usa esaki pa otro proposito duradero manera por ehempel un parke solar, of cualkier otro proposito na beneficio di e bario. Lo evalua e diferente forma di deshaci di diferente tipo di desperdicio unda cu reduci, re-usa y recicla lo ta central.

Aki por pensa por ehempel riba:

* re-introduccion di statiegeld pa boternan di glas of blekinan

* recicla y re-usa tur tipo di desperdicio

* un incinerator chikito special pa desperdicio medico na hospital mes,

* un incinerator pa cadaver di animal na abattoir (manera tin na mortuarionan)

* duna espacio pa compañia por re procesa tire pa uso di crea azeta, carbon black pa caretera, trottoir y/of otro procesonan cu lo por wordo compra door di sector publico

* usa foyonan di mata pa crea compost pa sigui planta.

RENOBA RWZI/BUBALI PLAS

Pone prioridad pa drecha RWZI cu ta data desde 1975 y cu ta trahando dobbel su capacidad cu e tin y mester wordo drecha cu urgencia. E costo pa un planta nobo ta alrededor di 60 miyon florin, y lo por wordo financia por medio di privatisa e planta, y unda lo inverti, opera y hasi e mantencion di e planta manera por ehempel e mecanismo cu a ser mplementa exitosamente caba na Boneiro den e regulacion di utilities.

Esaki lo wordo hasi por medio di un desaho publico. E compania lo recupera su inversion door di bende e awa cu e ta procesa pa irrigacion cu e hotelnan y canchanan di golf, cu lo ta mas barata cu usa awa dushi. Esaki lo no trese gasto adicional pa Land, pero si e solucion urgente y necesario pa e area di Palm Beach cu ta hasi uso di e planta aki.

E lo aumenta e capacidad, drecha e planta cu ta deteriora, percura pa no tin mal holo y evita un posibel desaster di desperdicio den nos laman.

OPTIMALISA SERLIMAR

Sanea e situacion financiero di Serlimar, inventarisa y aumenta eficiencia y productividad di e compania pa asina e por cumpli cu su proposito original di cumpli cu e tarea gubernamental di mantencion di terenonan publico, recohe desperdicio residencial y mantene Aruba limpi den e budget cu e ta wordo asigna.

Serlimar mester por cubri su mesun gastonan independientemente. Esaki ta algun di e solucionan proponi pa por yega na un maneho di desperdicio responsabel, sostenibel y duradero.Siña mas di nos planes pa Desaroyo Sostenibel: http://accion21.com/Si tin cualkier pregunta, comunica cumi libremente via email: daphne.lejuez@gmail.com of via messenger of whatsapp: 592-5302

Leave a Reply

Your email address will not be published.