Manera ta keda enfatisa den nos Programa di Gobernacion 2021-2025 enseñansa ta ocupa un funcion cardinal den desaroyo di nos pais. Enseñansa mester ofrece tur hende espacio pa nan por desaroya tur conocemento, habilidad y actitud cu nan mester, pa nan por funciona bon y logra exito den nan bida.
Ta importante pa henter comunidad y sector di enseñansa en particular haci su maximo esfuerso pa sigura cu cada ciudadano por siña durante henter su bida y asina desaroya y progresa.Esaki ta rekeri pa nos traha hunto y constantemente ta den dialogo y consulta.
Sin e aporte di y consulta cu nos maestronan y directivanan di scol nos no lo logra nos metanan na bienestar di nos comunidad. P’esey mes pa logra esaki mester duna prioridad na operacionalisacion di enseñansa den un ambiente transparente y sigur.
Trahando hunto nos ta logra mas. Na e siguiente manera MEP ta bay percura pa operacionalisa enseñansa den un ambiente transparente y sigur:· Structuralmente crea y mantene plataforma di dialogo entre stakeholdernan, manera Colegio di Cunsulta di Enseñansa, directivanan di scol, sindicato, Inspeccion di Enseñansa y Departamento di Enseñansa;· Crea un structura eficiente, sostenibel y duradero di mantencion y renobacion di edificionan escolar;· Percura pa condicionnan necesario caminda scolnan por crea un ambiente sigur pa e studiante, maestronan por traha y desaroya optimalmente.
Siguridad di scol ta basa riba e terenonan di siguridad di enseñansa, siguridad social-emocional, siguridad infrastructural y siguridad contra crimen;· Crea condicion pa mehora structura di cuido den e scolnan di tur tipo di enseñansa na beneficio di siguridad di enseñansa y siguridad social emocional.
Dicho mehoracion mester cuadra cu e “Quality Assurance Program” (QAP).Ultimo 3 aña y mei e veld di enseñansa hopi biaha a bin bati na porta di mi como Parlamentario pa pidi pa intervencion y pidi pa transparencia y consultacion. Na mas di un ocasion a pidi pa keda involucra den e proceso di tuma decision.
Un situacion cu na mas di un ocasion a keda atendí cu e minister en cuestion. Mi ta di opinion cu e situacion aki sigur no tabata uno adecuado y beneficioso pa nos enseñansa den su totalidad.
P’esey mes mi ta haya hopi importante cu MEP a pone den su programa pa crea un plataforma di dialogo structural. Mester crea e confiansa bek pa por ehecuta maneho/cambionan necesario y importante pa enseñansa cu ta na beneficio di nos mucha y hobennan.
Pa loke ta trata edificionan escolar, ami lo kier mira e siguiente scolnan haya prioridad:- Sint Aloysius cu ya ta 3 aña na Playa y cu e situacion cu nan ta aden sigur tin un impacto grandi pa e scol, maestro y nan muchanan.
Mester percura pa yega na un solucion mas pronto cu ta posibel den dialogo cu SKOA pa renobacion di nan edificio y percura pa renoba e contrato di VAD-gebouw pa 1 aña, dus pa henter e aña escolar 2021-2022;- Un solucion duradero pa Dependance di Maria College cu tambe ta situa den VAD-gebouw ya pa 4 aña y cu den e 4 añanan aki a sigui crece substancialmente.
Pa nan tambe mester percura pa renoba e contracto pa full e aña escolar nos dilanti;- Percura pa construi un edificio pa Frefe Bonifacius cu ya tin 9 aña sin un edificio;- Percura pa un solucion duradero pa Reina Beatrix Scol y Juliana School cu ya pa hopi aña ta for di nan edificio;-
Percura pa Paso pa Futuro por keda den nan edificio;- Por ultimo mi deseo di mas grandi, esta pa enberdad cumpli cu e necesidad di un MAVO-HAVO pa Noord cu ta accesibel pa un y tur y cu nos hobennan no mester bay scol te na San Nicolas.
Pa loke ta trata e dos ultimo puntonan cu ta trata e condicionnan necesario pa crea un ambiente sigur y pa mehora structura di cuido, mi ta kere cu den e ultimo añanan a cuminsa traha caba riba e aspectonan aki mediante di entre otro Social Crisisplan y cooperacion cu husiticia.
Pero sigur mester sigui haya e atencion necesario y importante a base structural y den consulta cu tur stakeholders den e keten di enseñansa, social y di cuido.Pa realisa e metanan describi aki riba ta rekeri cu e fondonan ta keda aloca pa enberdad nan bira realidad.
Presupuesto 2021 ta na Parlamento pa keda trata y sigur e puntonan aki lo mester keda enfatisa. Cu nan mester bay keda realisa den fase ta un echo, pero esey no ta kita cu nan urgencia mester keda enfatisa y cu nan mester keda trata como un prioridad.
Leave a Reply