Entrante dialuna 22 di februari 2021 Ta cuminsa vacuna nos adulto mayor di 60+

ORANJESTAD, Aruba –20 februari 2021: Segun e plan National di vacunacion, contra COVID-19, dialuna dia 22 di februari ta cuminsa vacuna esnan di 60 aña bay ariba. Entrante mayan diadomingo 21 di februari e invitacionnan lo cuminsa sali pa comunidad indicando e dia, orario y localidad na unda e persona mester acudi pa ricibi su vacuna.Ta conseha nos grupo di 60+ cu a registra via Aruba Health App pa ta pendiente di nan app y tambe di nan email den e proximo dianan cu ta sigui. Por lo menos un biaha pa dia tira un bista den e Aruba Health App primi riba e ‘icon’ di vacuna y chek si bo cita por a drenta. Na momento cu bo ricibi bo cita bo ta ricibi automaticamente bo cita pa bo di dos vacuna tambe. Esnan cu no tin smart phone y a registra na edificio di MFA tambe mester ta pendiente di e telefoon pa ora nan wordo yama. V acunacion di e grupo di 60+ ta plaña pa dura un promedio di 4 siman cuminsando dialuna dia 22 di februari. Tur invitacion lo no sali na mes momento p’esey e suplica ta bay na comunidad pa keda pendiente tur dia.Un suplica ta bay na doñonan di trabou pa ta flexibel cu empleadonan cu kisas ta haya un cita pa vacuna durante orario di trabou. Por medio di e Aruba Health App e empleado por prueba cu e tin un cita pa vacuna y despues di ricibi e vacuna tur persona ta haya un comprobante. Pa bienestar di salud di cada empleado, bienestar general y recuperacion di Aruba ta nesesario e colaboracion di empresanan pa cu cita di vacunacion di nan empleadonan.Es cu no a registra ainda por haci esaki via e Aruba Health App. Download esaki den playstore of por subi riba www.arubacovid19.org of tambe por pasa libremente na cualkier edificio di MFA di dialuna pa diabierna for di 7:30 pa 4:30 non stop pa por registra.

Leave a Reply

Your email address will not be published.