Nos como nurse ta prome jama pa ricibi e vacuna COVID-19 pa garantisa cu nos por sigui duna e cuido sin afecta nos mesun salud, salud di nos famia y nos comunidad. E vacuna no lo caba cu e virus di COVID pero sigur nos a drenta e era di por combati e pandemia aki cu menos peso ariba nos cuido medico.
Nos como nurse manera nos a drenta nos opleiding como studiante nos a ricibi nos prome vacuna cu nos profeshon ta exigi pa nos tuma, cu ta Hepatitis-B. Nos nunca por a pensa cu nos lo experiencia un pandemia cu awo nos ta para dilanti e decisión pa tuma vacuna contra COVID-19.
Manera nos por a wak tur trahando den cuido no ta duda pa tuma esaki. ODEA ta stimula pa tur persona cu ta traha directo of indirecto den cuido pa tuma e vacuna aki pa na prome luga proteha bo mes.
Aruba awo mas cu nunca tin mester di cada un profesional pa por sigui den e lucha contra e virus aki, cu a bin pa keda y a afecta mundo henter. ODEA Ta pidi comunidad pa banda di tuma e vacuna aki pa nos sigui cuida y mantene nos mes na e protocolnan di COVID, na tur momento.
Nos ta pidi tur hende pa registra pa asina juda nos colleganan di DVG cu ta registra y planea e action di vacuna aki por cana na un manera efficiente pa garantisa cu mayoría poblation di Aruba por ricibi esaki den e tempo stipula.
Sigur nos lo tin cu respeta cada persona cu no ta sinti nan mes kla pa ricibi e vacuna. Pa awo esaki ta bai den forma voluntario. Lo jega su momento cu pa bo por sigui move liber, traha y biaha bo persona lo mester tuma e vacuna aki.
Corda kon por ehempel ta persona nan cu ta traha den cuido so tawata haña e vacuna Hepatitis-B. Nos no tawatin e option si nos kier bira un nurse. Manera bo drenta opleiding, prome bo cuminsa bai stage bo mester a ricibi bo vacuna di Hepatitis –B.
Desde 2003 Aruba a tuma e dicicion pa inclui esaki den vacuna di nos muchanan manera nan nace. Dikon? Pasobra tur universidad rond mundo ta exigi esaki pa bo por inscribi na e Universidad.
Na tur cu ta duda y/of no ta sinti mes kla pa ricibi esaki. Nos kier encurasha bo persona pa busca e information correcto pa bo mes, di expertonan den e materia. Di personan cu a ricibi e vacuna aki kaba.
Nos niun no ta mescos. Tur hende por sinti diferente, pero no lo bira mes malo cu si bo no tin e vacuna. Nos tur tin e libertad di dicidi pa nos mes. Ta importante pa bo ta bon informa pa por tuma e dicicion correcto cu bo ta sinti bo mes bon.
ODEA ta felicita tur collega y tur c uta traha den cuido pa ta e ehempel pa tur cu ainda ta den duda. Nos ta desea tur profesional cu ta traha den cuido hopi forsa pa hunto nos sigui dilanti den e pandemia aki.
Nos lo vence mescos cu Florence Nightingale y tur nos dilanti a vence un pandemia. Laga nos sigui practica loke nos a siña con nan promer lugar nos mester cuida nos mes pa nos por cuida tur otro.
Nos ta desea nos colleganan di DVG tur klasse di éxito den guía e plan di action aki di vacuna Aruba hunto cu tur stakeholders den cuido. Den e pandemia aki nos ta un y cu un solo meta, brinda nos comunidad e mihor cuido cu nos por.
Nos ta tuma e vacuna pa nos por keda cuida cada cuidadano c uta biba ariba nos dushi isla di Aruba y tambe nos turistanan. Ban sigui registra pa asina mayoría di persona bibando aki na Aruba por ta vacuna.
Leave a Reply