Abogago y vice president di sindicato FTA, sr. Jose Figaroa ta papia riba e decision di corte caminda e ta ordena casino desaloha e espacio den Riu Palace Hotel.
E peticion a bin for di hotel pa motibo cu casino no a cumpli cu e debe. Nan a pidi hues, y hues a bay di acuerdo. Nan tin 30 dia bandona e espacio cuminsando for di dia 20 january.
Sr. Figaroa ta bisa cu no ta prome biaha cu situacion asina ta pasa. Nan a papia cu trahado pa wak e asunto di pago. Nan a tuma nota cu a saca algun machine, nan a papia cu gerencia pero mayoria di machine ta lease di otro empresa, e ta normal cu casino ta haci esaki.
“Nos a sinta cu trahado, gerencia y mediador pa yega na palabracion na cierto pago. Gerencia tin pago atrasa cu mester cumpli cune. Nan a sigura trahado cu e luna aki lo cumpli cune pero a bin hunto pa wak con lo para cu situacion despues cu casino mester sali”, e ta bisa.
Nan a explora ciero posibilidad manera trahado por bay traha na otro casino, of un hotel cu por tuma trahado. No a yega na nada concreto y ainda no tin claridad pero ainda ta explorando.
Sr. Figaroa ta bisa cu e situacion ta uno fastioso y nan lo kier pa trahado por haya nan pago, si e casino termina di bay bancarota, e caminda ta bira mas largo pero tin cierto cu tin pago segura pa sesantia.
Sinembargo ainda esey no a pasa y ta explorando pa wak con por duna garantia na e trahado y ki posibilidad tin den direccion cu por haya otro trabou.
Leave a Reply