Crimen bou di e hubentud

Un acto di crimen segun Pemberton – Leonard ta uno hancho mirando cu tur acto contra ley cu un hoben por comete, antes por a diferencia e crimen di adulto y hoben pero awendia no por wak e diferencia.

Locual e ta bisa cu antes e hoben mastanto tabata horta, joyriding di auto, kibra den cas, bringamento riba caya of na scolnan pero awendia e hoben a cuminsa comete delito mas grabe. Por nota cu hoben ta bay sera pa intento di asesinato, bendemento di droga, kibra den cas pa horta den grupo, bringamento grandi den gang ta ripara ‘bo ta pensa kico ta pasando?’ E ta bisa cu e promedio di aña ta varia pero e ta bisa un 70 pa 80 hoben ta cay sera pa aña.

E ta continua splica cu tin di nan ta prome biaha cu ta cay sera pero tin esnan cu ta keda bay ‘aña aden y afo’ te ora nan bira adulto. Ora nan ta perde bista ja cu no ta den e grupo di menor edad sinembargo e ta remarca cu nan no a sali afo den sistema pero pa motibo cu ta adulto ta bay na otro departamento ‘e ta cay bou nos mes pero e no ta wordo trata como menor di edad’.

Segun Pemberton – Leonard tin diferente factor cu ta hunga un rol den pakico un hoben ta bay sera. No por bisa cu ta solamente un factor. E ta un combinacion di diferente factorn y tambe un falta di otro factor y si bo pone nan hunto e ora bo ta haya un hoben basta problematico.

Locual e ta splica cu ta un factor criminologico, e ta factor cu ta causa den e bida di hoben cu algo no ta bayendo bon. E ta splica cu nan ta haya sa y calcula pa motibo cu manera un hoben ta cay sera, e ta wordo inscribi na reclassering.

E ta agrega cu nan ta bogando pa por haya e melding di tur hoben pa motibo cu e sistema no ta anda cu nan por haya tur. E ta continua splica cu a base di esey por haya un bista di e total ‘falta ainda pa haya e imagen completo di totalidad di e hoben’.

Una bes cu reclassering bishita e hoben, nan ta haya e rapport anto categorisa esaki. Di eynan nan ta haci investigacion di e diferente area, sea situacion familiar, na scol, e uzo di droga, tempo liber, e mentalidad di e hoben y situacion di trabou. Tur esey nan ta wak y saca afo cua ta e area debil.

Hopi biaha ta haya un hoben problematico cu tin diferente area debil anto e combinacion di e area debil ta haci cu e hoben ta cay sera bek, apesar cu tin area debil ta bay wak kico nan tin fuerte.

E ta bisa cu ora manda e forma pa ministerio publico, nan ta tuma e decision si ta laga e hoben bay, of e ta bay den kia ‘depende e gravedad di e caso’. Nan ta pone bou di e guia di reclassering. E factornan debil sra. Pemberton – Leonard ta agrega cu ta traha riba nan pa stabilisa.

Segun Pemberton – Leonard, si e hoben tin hopi factor, e ta dificil pa motibo cu e hoben no ta bay cerca nan, e ora nan tin cu bay cerca e hoben. Pa e motibo si nan ta hoben cu e situacion na cas no ta bon y hopi riba caya, e ta bira dificil pa gara nan y duna e guia necesario.

E punto cu ta haci nan manera reclassering debil den e guia di hoben pa cu no tin caminda pa pone nan ‘un luga unda nan por keda mas largo’. E ta splica cu pa motibo tin e plan cu ta biniendo cune di ‘ fundacion cu animo’ un centro unda cu hoben cu comportacion problematico por keda.

E ta bisa cu ora saca un hoben for di su ambiente anto ta dune e guia necesario, den varios caso e hoben por stabilisa su mes. E ta remarca cu na Aruba no tin casi nada pa e hoben cu ta uza droga.

Un sigur 80% cu 90% cu ta cay sera ta uza droga, no ta adicto pero nan ta uza. Tin hopi social users bou di e hoben cu consecuenia ta cu nan por bay mas leu. E  combinacion cu uzo di droga y e otro factor ta pone e hoben bira mas vulnerable pa locual tin rond den dje cu ta negativo

Ora di duna guia, nan ta purba di duna individual na cada un, tratando e diferente area. Nan tabata duna guia den grupo pero ultimo tempo no por pa motibo di cu hopi biaha e hoben ta bin di diferente gang, barrio no por pone hunto.

Leave a Reply

Your email address will not be published.