Parlamentario Alan Howell: Ta manda yama tur minister den Parlamento

Pa aña 2021 pueblo por spera cu Alan Howell lo enfoca hopi mas riba pariba di brug, specialmente riba proyectonan cu ainda no a mira lus di dia. Parlamentario Howell ta compronde cu Covid a stroba hopi di e proyectonan, pero no por keda sin menciona varios di nan cu ta den pipeline pa wordo desaroya, manera ta e hotel na San Nicolas, renobacion na Baby Beach, Fast Ferry, refineria, entre otro. “Mi ta kere esakinan ta bon proyectonan cu si mira lus di dia nos lo mira un cambio economico, un desaroyo nobo pariba di brug. Falta algun luna mas pa e gobernacion aki termina y sigur sigur den e lunanan aki lo mi persisti y lo mi press pa zorg cu e proyectonan aki cuminsa y bira un realidad”, Alan Howell a declara. Pa tal motibo tambe, e parlamentario a entrega un carta pa invita tur minister di Gabinete Wever-Croes pa acudi Parlamento y den un reunion publico duna cuenta di cada un di nan cartera pa loke ta trata pariba di brug y San Nicolas en especial. Adicionalmente el a bisa cu el lo kier mira den e lunanan venidero cu DOW tin mas accion pariba di brug. Kier mira mas desaroyo pa loke ta trata e parti di infrastructura pariba di brug. Tambe Howell lo kier mira barionan cu ainda no a wordo asfalta pariba di brug, wordo concretisa. “Mi ta gracidi DOW si a tur e trabounan cu nan a bin ta haci durante e ultimo 3 añanan, asfaltando un cantidad di bario pariba di brug, pero tambe pabou di brug. Pero intencion ta pa mi pone un tiki presion pa barionan manera Sabana Basora, Rooi Koochi, Savaneta, barionan den San Nicolas, Brazil y otronan tambe hayanan asfalt”. Habitantenan di e barionan aki ta acerca Alan Howell cu e peticion aki y e ta kere cu mester por ta posibel cu prome cu e gobernacion aki termina, e personanan aki por mira cu nan bario tambe a haya asfalt, pasobra nan tambe merece. El a manda e peticionnan aki ya caba pa gobierno pa asina nan haci peticion na DOW pa cumpli cu e deseo di e habitantenan aki cu pa añanan no a mira asfalt den nan bario.