Mayornan ta un di e personanan mas importante den e bida di un mucha

Mayornan ta un di e personanan mas importante den e bida di un mucha. Bou di mayornan ta compronde: un mama, un tata, y tambe otro personanan cu ta fungi den e rol di mayor.

For di momento cu un mucha nace, nan ta depende ariba e mayornan pa provee cuido cu nan mester pa por ta saludabel y feliz y pa asina nan por crece y desaroya optimalmente.

Pero tin biaha pa falta di informacion y guia tin biaha mayornan no por provee esaki. Segun estudionan haci door di “Centers for Disease and Prevention” y “National Academies of Sciences, Engineering, and Medicine” (NASEM), ser mayor ta significa algo diferente dependiente di e cultura y famia.

Pero tin algun aspecto di ta un mayor cu por wordo implementa den cualkier cultura y famia:

1. Sigui e mucha su iniciativa y responde na esaki den un forma cu ta anticipa. Ora ta responde na un manera anticipa, esaki kiermen cu e mucha sa kico lo pasa y con abo como mayor lo responde.

Ora e mucha tin un rutina cu ta consistente, e sa caba kico ta spere durante e dia. Ora bo tin reglanan cu ta wordo aplica na un manera consistente, bo yiu lo sa y anticipa cierto reaccionnan pa cierto comportacion.

Por ehempel: Bo yiu sa cu si e dal su ruman mientras nan ta hungando, e lo bay den “time-out.”

2. Demostra cariño y apoyoTin varios forma pa demostra cariño na un mucha, esaki por pasa verbal door di duna un compliment por ehempel door di bisa: “mi stima bo”, “mi ta orguyoso di bo”, “mi ta aprecia cu bo a yuda’mi haci e mesa limpi awe.”

Otro formanan di demostra cariño ta fisico por ehempel: un brasa, un holor di cabes, sunchi na frenta, of un otro forma di cuminda otro cu ta specialmente pa boso dos “un special handshake”.

Apoyo por wordo demostra na un mucha door di comunica na e nivel di wowo cu e mucha, esaki no ta solamente trece boso mas serca fisicamente pero tambe emocionalmente y ta laga e mucha sa cu bo ta apoy’e.

Scucha sin husga ora e ta conta algo, motiva e mucha cu palabranan positivo y demostra interes den nan interesnan y deporte.

4. Forma un rutina y tin regla di cas

Rutina y regla na cas ta esencial y importante pa un mucha su desaroyo y crecemento. Un rutina ta yuda un mucha sa kico su dia ta consisti di dje y reglanan ta yud’e compronde cua comportacion ta desea y cua no.

Ta bon pa tene na cuenta cu rutina y regla mester ta: realistico, simpel pa compronde y segun edad di un mucha. Ta importante pa tur familiar sigui e mesun reglanan di cas.

Un ehempel di esaki ta cu ora di come cu famia, no ta permiti ningun aparato electronico na mesa. E regla aki mester wordo aplica door di e mayor tambe. Paso un mucha ta observa tur cos cu e mayor ta haci. Pa e motibo aki como adulto mester ta un ehempel pa e muchanan.

Pa rutina y regla por ta efectivo mester por sigui esakinan consistentemente y habitualmente.

5. Lesa buki hunto y combersa cu e muchananLesa y papia cu muchanan tin hopi beneficio. Un di e beneficionan aki ta cu e ta un forma pa conecta cu otro persona.

Lesamento ta introduci un mucha na diferente zonido, palabra, y lenguahe y ta engrandece su vocabulario. Lesamento ta inicia un chispa di imaginacion y ta stimula curiosidad den muchanan.

Fuera di esaki, e ta yuda cu desaroyo den abilidad pa concentra, abilidad social, comunicacion y formamento di e seso.

6. Apoya su bienestar y seguridadUn mayor por apoya e bienestar y seguridad di un mucha door di provee un ambiente saludabel y sigur pa e crece aden. Por haci esaki door di implementa siguridad den cas y minimalisa peligernan presente den cas den forma di producto, aparatonan electrico, gas etc.

Supervisa muchanan ora cu nan ta hunga, laga muchanan relaha y drumi suficiente. Percura pa e muchanan come cuminda saludabel. Encurasha muchanan pa haci movecion of participa na un deporte. Percura pa un mucha tin un bon higiena y ta bon di salud.

7. Usando formanan di disciplina sin ta demasiado estrictoDisiplina no ta basa ariba creando conflicto cu un yiu of reacciona cu rabia. Disciplina den forma corecto no ta wordo usa pa controla un mucha, pero mas bien siñando un mucha con e por controla su emocionan y comportacion.

Poniendo reglanan y consequencianan ora cu no cumpli cu reglanan, esaki no ta wordo haci cu intencion di straf un mucha pero pa siñe regula su emocion. Un mucha cu a wordo siña kico ta bon y kico ta malo lo reconoce ora cu nan a haci algo cu no ta bon.

Un mucha lo kier coregi su comportacion pasobra e kier ta un mihor persona den sociedad y no pasobra e tin miedo di haya straf. Basa ariba e informacion publica di e estudio, mayornan cu ta practica esakinan por yuda nan yiu(nan) mantene un biba saludabel, sigur, y felis den areanan di emocion, comportamiento, cognitivo, y social.Fuente: www.cdc.gov “Parenting Matters”.

Pa informacion of pregunta por acerca Fundacion Pa Nos Muchanan – Cumana 2Tel: 5834247/5880856 – Whatsapp: 6998900E-mail: info@fpnm.aw – Website: www.fpnm.aw