Riba diaranson 2 di juni 2021 Gobernador di Aruba, Su Excelencia Alfonso Boekhoudt, a ricibi señor Edward Cheung pa un audiencia na Gabinete di Gobernador. Señor Cheung, ingeniero y cientifico na NASA y nace na Aruba, hunto cu su esposa y dos yiunan a bishita Aruba na honor di e di 83 cumpleaños di su mama.
El a informa Gobernador Boekhoudt di e bishitanan cu durante su estadia el a haci na scolnan cu e mes a bay antes na San Nicolas. Mayoria di e scolnan a combina e bishita di señor Cheung cu un siman den tema di espacio.
Alumnonan a haci uso na abundancia di e oportunidad pa haci preguntanan relevante, unda cu nan a demostra interes sincero den e trabou di señor Cheung. Edward Cheung ta un di e cientificonan cu a traha ariba e telescopico espacial Hubble.
Lansamento di esaki tabata un logro extraordinario pa National Aeronautics and Space Administration (NASA). Un detaye special ta cu su yiu muhe awor tambe tin cinco aña trahando pa NASA ariba e proyecto di continuacion di e Hubble.
Como reconocemento pa señor Cheung su compromiso pa cu e hubentud di Aruba na un manera special, Gobernador Boekhoudt na final di e audiencia a entrega un moneda di Gobernador na señor Cheung. Potret: © Kabinet Gouverneur Aruba
Leave a Reply