Esaki ta palabranan di meneer Maduro, ex cliente di Stichting Reclassering en Jeugdbescherming Aruba. Un persona cu a comete varios delito den pasado, pero cu a sa di cambia y mehora su bida cu e actitud corecto, bow guia di Reclassering y varios instancia.
Den un entrevista special, meneer Maduro ta duna su testimonio y conta con e cursonan cu ela sigi durante su trayecto cu Reclassering a yud’e cambia su forma di atende cu su emocionnan y con pa controla su rabia.
E trahado social cu a duna meneer Maduro e guia necesario durante su proceso di reintegracion, tambe tabata presente y a splica cu e actitud habri di meneer Maduro, y su motivacion pa ricibi ayudo y pa aplica e tareanan cu e tabata ricibi, a haci e proceso mas ameno.
Riba dia 8 di mei 2021, Stichting Reclassering en Jeugdbescherming a cumpli su di 60 aniversario. Durante e ultimo decadanan, e fundacion a duna servicio na nos comunidad y a logra realiza varios proyecto importante riba tereno di reintegracion y raportacion na Ministerio Publico.
No tur cliente cu yega na Stichting Reclassering en Jeugdbescherming ta mesun motiva pa cuminsa cu nan trayecto, mirando cu esaki ta bow orden di huez of fiscal.Den cuadro di e celebracion di 60 aña di existencia di Stichting Reclassering en Jeugdbescherming Aruba, e fundacion ta presenta un programa di radio special na Massive 103.5 FM riba diahuebs, 27 di mei 2021 pa 3’or di atardi.
E programa ta wordo presenta pa Tabitha Smith-Heemstadt y lo ta disponibel tambe via e Facebook page di Stichting Reclassering Aruba riba e mesun fecha y orario. Den e programa aki por scucha e testimonio completo di meneer Maduro y tambe su conseho pa hobennan y comunidad en general pa no cai den mal caminda. Un entrevista impresionante, for di experencia di un persona cu a pasa aden di berdad.
Leave a Reply