Diaranson merdia a tuma luga e inauguracion di Unidad di control di Cacho ‘Dog Control Unit’. Prome minister sra. Evelyn Wever-Croes a duna di conoce cu esaki tabata parti di compromiso ora cu el a drenta gobierno ‘pa atende cu problema di cacho riba caya’.
El a duna danki na tur cu a haci esaki posibel y cooperacion di ministerio di husticia, sr. Andin Dikker y ministerio di salud, Dangui Oduber y na tur cu a haci posibel cu a habri e centro di control di cacho.
For di basta tempo comunidad tabatin e preocupacion di problema grandi y serio cu tin di cacho riba caya. Algo cu el a menciona cu e Dog Control Unit no ta pa servicio di recoge bestia morto mirando cu esey ta tarea di Serlimar.
E unidad su tarea principal ta pa pasa recoge e gran cantidad di cachonan cu ainda ta cana los, tanto esnan cu doño, como esnan sin doño. Di e forma aki ta spera di reduci e cantidad di cachonan cu tin riba caya.
Tambe ta pa evita e cachonan aki causa molester of esnan cu ta peliger y ta ataca bestia di otro cura of muchanan. Tampoco lo causa molester pa turista y deportistanan riba camidna.
E cachonan aki lo wordo hiba na e Centro di Control di Cacho pa wak si ta logra reuni nan cu nan doño. Ta importante pa remarca cu cacho y pushi morto ta keda trabou pa Serlimar y no por yama e Unidad di Control di Cacho pa recoge bestianan aki morto riba caya.
E Unidad di Control di Cacho lo ta tambe un Unidad cu lo controla e supervision y cumplimento di entre otro nos Ley di Cacho cu ta na vigor desde 2015. E cooperacion di KPA (Cuerpo Policial y Burea City Inspector)
E vehiculo aki, ta un van cu Minister di Husticia a facilita y cu awe e ta entrega simbolicamente na Bureau City Inspector, pa por eherce e funcion aki. Si e unidad recoge un cacho for di caya y ta resulta cu e cacho tin doño, esaki por tin consecuencia pa e doño a base di su responsabilidad segun e Ley di cacho. P’esey ta conseha doñonan di cacho pa percura pa nan cacho ta den cura.
Leave a Reply