Diaranson 24 di februari 2021, den e auditorio di Aruba Adventist Academy yena cu mamanan hoben y famia, miembronan di Parlamento di Aruba, miembronan di Hunta Directiva di ADRA Aruba y demas invitadonan special; Fundacion ADRA Aruba a duna clausura na e di dos grupo di e proyecto pa mayornan hoben bou di e titulo ‘From Teenage Parents to Life coaches’.
Sra. Yvonne Geerman- Bermudez, director di Centro pa hoben y famia ta splica riba e di dos edicion di e proyecto aki a inicia den e luna di oktober di aña 2020 y e tawata un trayecto cu a dura 5 luna.
E grupo meta tawata e mayornan hoben entre e edad di 17 te cu 22 aña. Durante e trayecto e mayornan hoben a ricibi hermentnan cu lo yuda nan regresa den nan bida estudiantil, den e mundo laboral of habri nan propio negoshi.
Di e grupo aki, 9 mama hoben a sigui e curso sea den manicure, pedicure, obra di man, cushina, trabou du area, pero tambe e desaroyo personal manera self-esteem, responsabilidad, relacion di mayor y yiu. Otro partinan esecencial.
“Nos ta sumammente contento y satisfecho con el a cana. E yiunan di e mama a keda den opvang pa 5 luna pa 4 ora pa asina e mama por a dedica e dos dia pa siman den nan training. Ora nan a haya certificado nan a keda orguyoso den nan mes cu confiansa pa sigui den nan bida.”
Durante e duracion di e proyecto, e mamanan hoben tawata ricibi les dos biaha pa siman for di 8’or di mainta te cu 12’or. E lesnan practico cu nan a ricibi tawata cushinamento, cocemento, obra di man, beyesa, manicure y pedicure.
E lesnan teoretico tawata consisti di etiquette y protocol, relacion entre mama y yui, administracion basico, salud en general incluyendo salud mental, emocional y spiritual.
Durante cada les cada cursante a ricibi conocemento cu lo yuda nan den nan propio desaroyo, habilidadnan cu nan lo por pone den practica y un actitud a wordo forma cu lo habilita nan pa tuma decision pa nan propio bienestar.
Durante e ceremonia di certificacion, e mayornan hoben a ricibi un detaye cu lo yuda nan sigui specialisa y desaroya den nan area di interes. En total 9 participante a ricibi nan certificado den e diferente areanan imparti.
E siguiente trajecto lo cuminsa na maart y tin luga ainda pa hende muhe hoben cu kier participa, enfoke pa e mamanan hoben. Nan ta spera cu pa futuro nan por dedica na hende homber. Por comunica cu Centro pa Hoben y Famia na 5281200.
Director ADRA Aruba Alcidra Jansen-Richardson y Fundacion ADRA Aruba a expresa di ta sigur cu cada un di e participantenan a ricibi e guia adecua cu lo yuda nan den estima propio, desaroyo emocional, comunicacion, responsabilidad y participacion social, liderazgo y emprendimento.
Actualmente, ADRA Aruba ta preparando pa inicia cu e di tres grupo di mayornan hoben ‘From Teenage Parents to Life Coaches’ den e luna di maart.
E di dos edicion di e Proyecto Mayornan Hoben ‘From Teenage Parents to Life Coaches’ a tuma lugar den colaboracion cu Sra. Yvonne Geerman di Centro pa Hoben y Famia, Sra. Monique Giel di Wit Gele Kruis y Sr. Willem Seferina di Desiree’s Banket.
Fundacion ADRA Aruba ta gradici cada un di e personan cu a haci posibel e Proyecto uno exitoso, un danki special na Cede Aruba y Kiwanis Club Palm Beach pa nan sosten financiero.
Sra. Jansen-Richardson ta bisa cu ADRA ta un organisacion internacional pa ofrece yudansa pa esnan menos privilegia den paisnan menos desaroya.
E ta bisa di e curso, hopi di esnan cu a caba kier sigui opleiding, kier sigui desaroya of busca un trabou. Tambe cu mayoria di nan lo cuminsa cu algo pa nan mes anto esey ta yuda tambe stimula economia di Aruba.
Leave a Reply