Den un reciente entrevista cu directora di CENSO, Sharin Luydens ta duna un splicacion amplio riba con e votacion ta tuma luga. Segun e ley di derecho pa vota, e urna lo habri for di 8or di mainta te cu 8or di anochi.
Pa ley, e dunado di trabou ta duna su trahado 4 ora cu ta derecho pa asina e por bay vota, esaki den caso cu e persona no ta liber den e orario. Esey ta e leynan electoral. Aunke semper ta keda opcion di ta den man cu e doño di trabou pa tin un bon entendemiento.
Tambe Luydens ta splica cu e voto ta invalido ora cu no ta sigur pa cual persona e ciudadano kier a vota. Sea si yena mas cu un bala, si marca cu otro pen cu no ta esun cora, si a skirbi nomber of cualkier cos riba e stembiljet.
Un otro punto cu e ta menciona ta si e cantidad di personanan cu keda sin bay vota ta causa cu e kiesdeler ta baha, pasobra e unico cos cu ta conta ta e votonan valido. Votonan invalido tambe ta causa cu e kiesdeler ta baha.
Un votado por pidi presidente di e Urna pa laga un persona drenta cu ne, solamente si e tin un limitacion fisico. Pues si e tin problema cu bista of cu e no por move un brasa, pero no ta contra pa esnan cu tin un limitacion manera autismo, of otro limitacion.
Pa finalisa cu e parti di votacion, Luydens a menciona cu cualkier persona por bay riba lista, e no mester ta un votado. Conseho Electoral no tin autoridad pa kita nan nomber for di e lista. E ta algo cu legisladonan a scoge pa hacie di e forma aki ya caba na 1987. Pero e situacion ta haci cu e persona ey, si e haya voto, e no por drenta Parlamento.
Leave a Reply