Ta introduci 913 como number gratuito di urgencia pa emergencia riba lama

Ariba peticion di oficial di Kustwacht Voor Het Koninkrijk Der Nederlanden, Minister encarga cu e Carteranan di Transporte, Comunicacion y Sector Primario, sr. Chris Romero, ta pone na disposicion e number 913 pa alerta cualkier emergencia cu por presenta riba lama.

E activacion di un number di emergencia pa personanan riba lama raporta cualkier situacion urgente, ta algo cu ta den planificacion for di Augustus 2020 y awor finalmente e ta un realidad.

E number 913 ta den funcion caba y for di aworaki por wordo uza, di manera gratuito, pa cualkier persona den posecion di un telefon celular of telefon di liña.E activacion di un number di emergencia pa emergencianan riba lama, ta algo sumamente importante pa paisnan cu, manera ta e caso di Aruba, tin un trafico maritimo halto.

Di e manera aki por sigura cu servicionan di emergencia, manera Warda Costa, Polis Maritimo y demas por wordo activa inmediatamente y yega mas liher na auxilio di esnan cu ta den un urgencia riba lama.

Minister Chris Romero ta extende su palabranan di gradicimento na nos compania Estatal di Telecomunicacion, Setar NV, cu diligentemente a percura pa e proceso di articulacion di e number di emergencia 913, a cana su caminda y cu awe e ta un realidad.

Tambe un gradicimento na Digicel pa e coperacion di mantene e tarifa gratis pa su usuarionan cu lo mester haci uzo di e number di emergencia 913.