Recientemente presidente di CAft sr. Gradus a haci mencion di diferente tereno cu mester atencion. Asina CAft a indica cu e maneho financiero di Serlimar tabata malo y cu Serlimar a ricibi fondonan publico di forma inaceptabel.
No a importa ex-minister Oduber ni tampoco ministerraad cu e maneho y procesamento di desperdicio tabata laga hopi di desea y cu defacto Serlimar tabata bancarota. Gobierno y Parlamentarionan di coalicion tabata cera wowo pa corupcion orchestra pa ex-minister Otmar Oduber.
E tabata usa Serlimar djis pa complace su sponsornan. A muda Serlimar for di San Nicolas pa Pos Chikito pa acomoda un di su sponsor mayor. Pronto Serlimar lo ta back na Kockstraat. Tambe a palabra cu un otro sponsor di POR lo bay ehecuta gran parti di e trabou na Sero Teishi a base di un prijs exorbitante halto y sin un destaho publico.
Aki atrobe sin cu un musca a bula y awor e cuenta ta wordo presenta na pueblo door di CAft. Despues cu O.O. a baha como Minister, nos a mira cu a yega na acuerdonan nobo cu un otro compania local pa haci e trabou na Sero Teishi, pasobra a bira obvio cu e compania sponsor di Otmar y POR NO tabata cumpli.
Despues cu e minister sra. Lopez-Tromp a ser baha, usando tacticanan contra tur clase di etica y te hasta actonan penal, nos a tuma nota cu e Minister Presidente a core asumi e responsabilidad pa e.o. Serlimar.
Nos a bin ta ripara cu e Minister Presidente no tabata “give a damn” kico tabata sosode e.o. na Serlimar. Ni ora cu e landfill na Parkietenbos tabata na candela recientemente, sra. Croes a tuma e molester pa yama e director pa puntré kico a pasa. Aparte di esaki un problema eminente a surgi na Sero Teisha.
UPP a ricibi yen di reclamo encuanto e gasnan toxico tanto na Parkietenbos como na Sero Teishi cu ta rekeri atencion directo y liher pa evita un desaster, pero parce cu e reclamonan ta dirigi na un gobierno sordo y mudo pasobra nada no ta pasa.
UPP a yega di vocifera su preocupacion riba e maneho di Serlimar den pasado. A denuncia falta di experencia y experticio di esnan encarga cu e trabou na Sero Teishi. UPP a mustra potretnan con ta djis hisa benta e “bales” den e buraco cu a ser coba eynan SIN cu a pone “liners” PROME, cu ta sumamente necesario pa stroba un eventual ‘leakage’ den e subsuelo di Aruba. Tampoco a usa tubonan pa e gas toxico por sali.
E trabou investigativo di UPP a bira e tempo ey un sumpiña den wowo di e ex-Minister, Ministerraad y ehecutivonan di Serlimar y a bai asina leeuw pa prohibi entrada di e lider di UPP dia cu e kier a bay observa kico tabata pasa eynan.
Ningun prohibicion sinembargo lo stroba UPP pa keda atende cu asuntonan di importancia pa nos pueblo. P’esey UPP a dicidi pa evalua personalmente con ta para cu e “landfill” na Sero Teishi, specificamente encuanto e gas toxico.
UPP a encontra dos problema. Na prome lugar UPP a constata cu un compania priva ta haci uso comercial di e santo cu ta coba na Sero Teishi. Pero alarmante ta e situacion di e gas. E potret cu UPP a logra di saca na Sero Teishi ta mustra e gas cu ta sali for di e “bales” lo por bira un peliger eminente.
Un ora pa otro por explota, causando dañonan grandi, na nos Medio Ambiente y tambe pa e habitantenan di Parkietenbos y Simeon Antonio y vecindario. No por lubida tampoco e peliger cu avionnan cu ta pasa riba Sero Teishi.
Pues accion mester tuma lugar di inmediato.Pero e unico accion sinembargo cu Prome-Minister encarga cu Serlimar a haci ta inicia cu nombracion di un director nobo. Ta di spera cu lo haci un escohencia drechi y no un “windowdressing” pa na final nombra un miembro di e inner circle di e clan di “friends & family” toch! UPP ta urgi Parlamento pa lanta for di soño.
Tuma e situacion na serio y exigi gobierno pa atende cu Sero Teishi awor, pasobra un explosion lo ta devastador, pa bida di hende, economia y turismo si encaso aeropuerto wordo atacha. Den pasado UPP a trece posibel solucion pa procesamento y recohemento di desperdicio en general.
UPP a sugeri un “sinergia” entre Serlimar y un compania local priva. Pa e colaboracion ta un exito sinembargo lo mester exigi transparencia, pasobra parce cu esun cu ta benficia di e colaboracion awor ta e compania priva cu ta haci uso entre otro di e santo cu ta sali for di cobamento na Sero Teishi pa uso comercial.
E pregunta ta si Serlimar ta ricibi un entrada di esaki. Si esaki no ta e caso anto, anto no tin fair-play cu otro companianan cu tambe ta coba pa uso comercial.Prevencion ta e palabra clave pa evita un catastrofe, mescos tambe un plan di accion comercial cu ta basa riba transparencia y profesionalismo.
Un plan na unda e habitante di e bario di Parkietenbos y vecindario lo beneficia, pero tambe e pueblo cu porfin por conta riba un plan realistico di procesamento y recohemento di desperdicio na un prijs comodo pa tur saco. Un plan cu lo mester percura sobrevivencia di
Serlimar cu awor ta desangrando. Un plan cu lo brinda Serlimar e oportunidad pa comparti sikiera parti di e ganashi cu parce e compania priva si ta haya cu entre otro uso comercial di e santo di Sero di Teishi.
Leave a Reply