Aruba ya caba tawata trahando riba documentacion di e posibel impacto di e virus di Covid-19 riba Aruba su turismo ora cu dia 13 di maart 2020 nos isla a conoce su prome caso di Covid-19.
Na un manera rapido A.T.A. a ripara cu mester a ahusta e ehercisionan di impacto un biaha mas, Covid-19 a bira e crisis di mas grandi cu a asota mundo di biahe y turismo, incluso esun di Aruba.
E ultimo crisis grandi mundial tabata esun di ‘9/11’ na aña 2001, y pa Aruba nos a conoce tambe e crisis di Natalee Holloway na aña 2005.KICO E PANDEMIA A NIFICA PA ARUBA SU TURISMO?
Cu un caida di 67% na aña 2020, Aruba a bay bek den tempo y por a conclui cu nos a mira mas o menos e mesun total di cantidad di bishitante cu nos destinacion a mira na aña 1989. Tambe por a observa hopi cla cu e crisis actual ta mas grandi pa Aruba compara cu e impacto di 9/11 y di Natalee Holloway.
Despues di añanan di crecemento, awo nos industria turistico a conoce un caida drastico. E proceso di recuperacion lo ta uno gradual unda cu ta anticipa di mira adelanto e aña aki, otro aña y sperando cu pa 2023 lo por mira cifranan di cantidad di bishitante cu a mira na 2019.
Aruba a cera su fronteranan entre dia 17 pa dia 26 di maart 2020 y poco poco a bolbe habri su frontera dia 15 di juni, iniciando cu buelonan for di Corsou y Bonaire. Aki nos a mira un recuperacion gradual y habriendo nos fronteranan pa mas pais, a logra un total di 42.936 bishitante na luna di december 2020.
No obstante cu Aruba ta contento di por yama bonbini atrobe na su bishitantenan, mundialmente e situacion rond di e pandemia ta sigui cambia y 2021 a habri cu diferente reto. Esun mas grandi tabata sin duda e exigencia cu Merca (CDC) a introduci na januari, cu esnan cu ta drenta Merca mester mustra un resultado di test negativo pa por drenta. Aruba a actua rapidamente y a percura pa e rekisito aki no ta un drempel pa biaha bin Aruba.
Awo nos isla ta conta cu un total di 26 diferente facilidad unda por haci e test, incluso na hotelnan tambe, esaki sigur ta haci’e facil pa esnan cu ta bishita!Banda di esaki e proceso di vacunacion, ambos pa esnan cu ta vacuna den e pais di unda nan ta bishita y e proceso aki na Aruba ta yuda brinda e confiansa den e biahero pa sigui bishita nos isla.
Si acaso cu e turista ta test positivo mientras cu e ta na nos isla – A.T.A. ta conta cu cerca di 100 acomodacion cu por wordo uza pa isola turistanan y e proceso ey ta canando bon.Cu e adaptacionnan aki, Aruba a cera na januari cu un total di 31.368 bishitante y na februari cu 31.982 bishitante pa nos destinacion.
Pa aña 2021 nos ta spera un adelanto gradual di turismo pa Aruba y e speransa ta di por yega na locual Aruba a mira como cantidad di turista na añanan 1991 of 1996, depende di con e aña progresa.
CON E DI DOS KWARTAAL LO MUSTRA?
Aruba ta wordo mira como un destinacion cu protocolnan stricto, cual ta brinda confiansa cerca e posibel bishitantenan cu nos isla ta un isla sigur pa pasa nan estadia. Asina Aruba ta sigui ta halto den e demanda loke ta ofrece optimiso pa maart y pa e di dos kwartaal di e aña aki!
Nos isla ta spera un total di 42.000 bishitante den maart y pa e di dos kwartaal e proyeccionnan ta mustra cu e crecemento lo re-anuda atrobe apesar di e prome dos luna di aña 2021 unda a mira hopi reto. Aruba lo conta cu un total di 343.950 asiento aereo di cual 285.589 ta for di nos mercado principal cu ta Merca. Aki e crecemento lo ta proyecta di ta entre 23% – 46% pa e di dos kwartaal compara cu prome kwartaal di 2021.
CUANTO E BISHITANTENAN TA GASTANDO TE CU AWO?
Segun e ultimo datonan, durante 2020 e bishitante a gasta un average di AWG 661.-pa dia den nos economia, loke ta mas halto cu normal. Compara cu 2019 por ehempel na unda e bishitante tawata gasta un average di AWG 455.- pa dia. E perfil di nos bishitantenan y esnan cu ta biaha ta mas experiencia y nan ta dispuesto pa paga mas. Tin indicacion cu e tendencia aki a continua den e prome dos luna di 2021 tambe.
CONCLUSION:
Actualmente un tercer parti di diferente paisnan rond mundo ainda tin nan fronteranan cera y esaki lo tuma hopi tempo pa recupera di esey. Pa esnan laborando principalmente den e sector ta sumamente importante pa nan ta vacuna pasobra esaki lo ta un parti intergral pa cu nos recuperacion economico.
Sin duda alguno nos tur a sa di bira mas resiliente y mas creativo cu aun mas aprecio pa nos turismo. Pa bienestar di nos cada uno ta importante pa nos turismo florece. Nos tur sa cu nos propio comportacion por acelera e recuperacion economico, pero tambe por stroba esaki.
Sigui nos mes na protocolnan estableci ta sigui ta importante como parti di e recuperacion. Ban cuida tambe nos recursonan natural, nos playanan, flora y fauna. Naturalesa a haya chens di hala rosea, ban proteha esaki.Di parti di Aruba Tourism Authority ta gradici nos socionan tur cu a coopera durante mas cu un aña pa hunto nos a atende cu retonan grandi y traha riba recuperacion di nos isla.
Leave a Reply