‘Medida tras medida den cuido pa falta di mal maneho mientras gobienro ta tira serbete den ring y bira demisionario’

Despues cu gobierno di Aruba, especialmente e minister encarga cu Salubridad y e Minister encarga cu Asuntonan General, a causa hopi danjo na salubridad publico, dor di mal maneho, awor nan ta tira serbete den ring y bira demisionario. 

Evelyn Wever Croes a acepta condicionnan di Hulanda a cambio di placa y a bai di acuerdo pa corta drastico den cuido. Esaki mientras cu Secretario di Estado Knops a declara cu no necesariamente Aruba lo mester corta den cuido. 

Dor e palabracion descabeya di Evelyn Wever-Croes y Dangui Oduber cu Hulanda ta corta 5 miyon florin tur luna den cuido. AZV ta aplicando 5.5% riba e tarifa di abonnement di dokternan di cas.

Pa cu esaki diferente stakeholders den cuido a reuni cu Parlamento dia 13 di januari 2021 pa mustra nan inquietud y gobierno a manda nan bai sinta den un comision pa papia.

A tuma nota cu awor dokternan di cas no ta contento y lo disminui nan orario di atende pashent cu un ora. Esaki sigur lo afecta cuido di pashent mas ainda. 

Un otro medida di Dangui Oduber y Evelyn Wever Croes cu ta refleha nan mal maneho ta reduccion di e lista positivo di medicina te na 80 y a base di esaki pashentnan mester paga pa remedinan cu no ta mas riba e lista positivo plus un Pharmacist fee.

Esaki ta afecta esnan mas vulnerabel den nos comunidad y esnan cu no tin entrada ni pa come corda pa paga medicina. Un otro medida mas ta cu a desminui e postnan di duna vacuna  na ciudadanonan.

Enbes cu ta aumenta e facilidadnan pa por vacuna nos hendenan pa aumenta inmunidad di nos comunidad y pa reactiva nos economia, ta stroba e proceso aki. Ya na diferente ocasion Wyatt-Ras a trece padilanti cu gobierno mester yega tambe na esnan cu no tin e posibilidad pa bai na un MFA of por registra via di e Health App.

Por haya sosten di mediconan y hasta por busca e bus di salud pa bai na diferente sitio pa por vacuna esnan cu no por move facil for di cas. Pueblo y awor hasta dokternan di cas ta harta di e mal maneho di e gobierno aki.

Enbes cu gobierno ta sostene dunadornan di cuido, kendenan ya caba ta trahando incansable durante oranan largo, e ta corta den nan salario y scrutina nan. Esaki contrario na otro islanan manera Boneiro cu si a duna dunadornan di cuido un bonus. 

E hecho cu e gobierno aki despues di nan mal maneho y e hecho cu nan no por a tuma decisionnan paso nan a keda pleita durante casi 4 anja, a dicidi di bai cas a cai den bon tera cerca ciudadanonan.

Nos ciudadanonan merece mihor. Nos ciudadanonan merece un gobierno cu curason pa pueblo. Wyatt-Ras ta menciona cu lider di AVP recientemente a manda cu carta pa e secretario di Estado expresando su preocupacion pa cu e situacion di nos salubridad.

Ta necesario pa re-evalua e decision descabeya di medidanan den cuido. Wyatt-Ras ta menciona cu ta di importancia pa atende cu pashentnan di COVID na un manera digno y profesional.

DANKi na renobacion di nos Hospital, cu a inicia den gobernacion di AVP, awor por “schaal” op e facilidadnan di cuido y di ICU pa nos pashentnan.Hasta Hospital por yuda pashentnan di COVID di hermana isla Corsou.