Dialogo cu Comision Europeo pa yega na un solucion transformativo y sostenibel cu lo por scapa Aruba por lo menos Afl 375 miyon

Enbista cu Directie Financien Aruba a sera Q. 1 2021 y tin pues un mihor bista ariba e debe total cu Hulanda cu a acumula desde April 8, 2020 pa April 9, 2021, awe mi a entrega un carta oficial na Comision Europeo, pa hunto nos yega na un solucion transformativo y sostenibel cu lo por scapa Aruba por lo menos Afl 375 miyon na debe debi na e crisis di Covid-19.

Na Juli 2020 e Council of EU Ministers a bai di acuerdo pa (den futuro) cancela 52% porciento di tur asistencia financiero (debe) cu ta wordo extende na e paisnan miembro di Union Europeo.

Despues di a consulta cu algun Parlamentario Europeo y e “Head of OCT Unit” di Comision Europeo, como Presidente di e Comite Ehecutivo di OCTA (Association of Overseas Countries and Territories = OCTs) mi a agendeer e punto aki tambe na September ultimo den e reunionnan mensual di e Comite Ehecutivo.

Sucesivamente, den consulta cu tur e otro 5 paisnan OCT-Hulandes, mi a compila un Intervention incluyendo diferente puntonan di atencion y urgencia. E compilacion aki a resulta den un statement cu a wordo presenta pa Minister President di Aruba durante e di 18th OCT-EU Forum dia 10 di December 2020.

EU-Commissioner Urpilainen tambe tabata presente na e Summit aki y e a enfatisa cu Union Europeo ta receptivo pa hunto nos dialoga y na un manera transformativo y cu cooperacion di nos member-state Hulanda, yega na un solucion sostenibel pa e reto aki di Aruba.