E infrastructura di Noord y area hotelero mester atencion urgente

Sra Jennifer Arends- Reyes ta di opinion cu hopi districto y mantencion na Aruba a bai hopi atras den e ultimo 4 añanan. Esaki Sra Arends-Reyes a trece dilanti na varios ocasion den parlamento.

E infrastructura den e area di Noord y area hotelero ta uno cu mester atencion urgente. Noord ta e districto mas grandi na Aruba, cu mas habitante y cu tin Turismo centralisa den e area. Sinembargo despues di inversionnan den caretera, retonde,schoolnan y MFA door e gobierno di AVP durante 2011 pa  2017, awo durante 4 aña a keda para den inversion pa infrastructura na Noord.

Renobacion di caretera a keda para literalmente di Oranjestad pa Sint Anna school y durante 4 aña no por a renova e caminda di Sint Anna School pa Tierra del Sol. E retonde cu mester a bin na CMB Noord, no a bin y e retonde principal pa economia di Turismo, serca di entre otro Mc Donald’s noord a keda decora cu pelonnan oranje causando desgracia tur siman.

Despues di e bon regulacion di trafico, cu e Green Corridor y Watty Vos Ringweg comunicando Hotel-area, cu Oranjestad pa San Nicolas, taxistanan, V-carnan y otro trafico biniendo hotelnan y bunita beachnan di Aruba mester dal den un retonde peligroso na e Crusada aki.

E boulevard comunicando Phoenix Hotel & Resort bayendo direction di Ritz Carlton, tampoco a wordo renoba lagando tur nos High-rise hotel cu un first bad impression.Awor kier pidi pueblo disculpa, caminda simplemente bo tawatin 48 luna, pa coi e telefoon y bisa D.O.W. cu e careteranan y retonde na Noord ta prioridad pa e pilar di economia di Turismo, spera cu pronto Aruba por wak un cambio na beneficio di nos ciudadanonan y bishitantenan.

Tambe pueblo di Noord ta pidi pa restitui e MFA Noord su funcion cu e la wordo diseña pe cu cuminda cayente merdia, bibliotheek pa mucha, area pa mucha, nochinan di informacion, lugar di estudio cu computer y Wifi pa hobennan sra Arends-Reyes ta termina bisando.