Michella Lacle-Steenvoorde: Identidad nacional ta a base pa forma un miho educacion

Michella Laclé e/v Steenvoorde candidato number 27 riba lista di MEP a duna di conoce cu Movimiento Electoral di Pueblo semper a trata sistematicamente pa eleva calidad di educacion na Aruba y a sinta den diferente proyectonan pa analisa y diversifica e sistema di educacion y ta di opinion cu educacion ta forma parti di e maneho strategico nacional di un pais.

P’esey mes lo percura pa cambio, adaptacion y creacion di diferente ley di enseñansa tuma luga pa garantisa implemenatcion di PEN 2030 den consulta constante cu docentanan. Manera nos tur sa, PEN ta para pa Plan di Enseñansa Nacional y e ta un lista di enfoke y metanan cu entre otro Departamento di Enseñansa a delinea pa por cumpli cu ne prome cu e aña 2030.

Riba 20 di november di aña 1989, Nacionan Uni a stipula e tratadonan internacional di derechonan di mucha. 54 articulo di ley di proteccion di mucha. Casi tur pais na mundo a ratifica e tratado aki. Aruba a ratifica e tratadonan aki na 2001.

Articulo 30 di derechonan internacional di mucha ta papia di e derecho di un mucha pa haña enseñansa den su mesun idioma y cultura, muy en especialmente si e idioma ta uno cu no ta wordo papia na hopi luganan di mundo.

Pa kico esaki ta importante?

Pasobra un mucha ta compronde conceptonan nobo mas miho den su mesun idioma. Den pasado nos enseñansa tawata concentra hopi riba reproduci informacion (siña foi cabes), nos kier concentra riba desaroya e abilidad di pensamento critico (compronde conceptonan dificil). Esaki no lo bay impidi nos muchanan den futuro pa bay studia afo. Apesar di todo tin hopi Hapones ta bay studia na TU DELFT y nan nunca a haña enseñansa den Hulandes na nan scol basico!

Na momento cu nos tuma educacion y combina esaki cu idioma y cultura di loke ta biba den nos propio pais di maneranan innovativo, Aruba ta den un bon caminda pa desaroya otro areanan y niche turistico na nivel internacional. A pesar di todo un turista kier wak nos cultura y identidad ora e pisa nos suela, pues nos mester cuide.

Creatividad, innovacion pa stimula entre otro Identidad Nacional, cultura, historia, den educacion primario y secundario ta e prioridad di e Plan di Enseñansa 2021/2024.

Den e area cultural, e identidad Arubiano ta importante, cu un perspectiva di diferente angulo di enfoke. E rol di educacion den e mantenimiento y e desaroyo di e cultura Arubiano ta hopi importante.