Ami tambe ta importante: ‘Cuido propio pa mi por cuida un otro’

Diasabra 22 di mei 2021 a tuma lugar un seminario virtual titula: Ami Tambe Ta Importante: “Cuido Propio Pa Mi Por Cuida Un Otro”. E seminario virtual a wordo organisa pa Fundacion Pa Nos Muchanan y a dicidi e biaha aki pa enfoca ariba e bienestar di nos mayornan den cuadro di luna Internacional di famia.

E meta di e seminario tabata pa brinda nos mayornan y tur otro persona encarga cu cuido di mucha informacion y formanan practico pa incorpora cuido propio. E momento cu un mayor su estado general ta bon e por ta un mihor mayor pa su yiu(nan) y brinda un mihor cuido.

Den e transcurso di un dia hopi biaha mayornan ta pone otro responsabilidadnan prome y lubidando su mes. E seminario aki kier a recorda mayornan cu “Abo” tambe ta importante y con pa tuma tempo pa bo mes mientras cu bo ta balansando otro responsabilidadnan.

E seminario a cuminsa cu un actividad facilita pa Sra. Nannelle Croes di Transition2Health mustrando nos mayornan tecnicanan cu mayornan por haci pa relaha como un forma di check-in cu bo mes den 15 minuut.E seminario a continua cu e prome orador, Sra. Micheline Mathurin di Fundacion Respetami cu a papia ariba e maneho di stress, e impacto di stress ariba lantamento di mucha.

Micheline a papia ariba e señalnan di stress y a ofrece tipsnan practico cu mayornan por aplica pa maneha stress.E siguiente orador cu a presenta den e seminario tabata Sr. Rhomyko Winklaar e Director di Tienda di Educacion cu a enfoca ariba balansa entre bida personal y bida di trabou.

Den e presentacion a brinda varios conseho y formanan cu por segura un balansa entre bo mes como un individual, e bida familiar, y e bida laboral. Sra. Raymicheline Raymond a forma parti di e seminario, brindando mayornan conocemento ariba e tereno di salud mental di un mucha relaciona cu nan medio ambiente y tambe a ofrece consehonan practico cu mayornan por implementa.

Raymicheline ta un psicologo di mucha y hoben, terapista sistematica, y un specialista di salud mental di mucha na Respaldo.Finalisando e seminario tabata Sra. Clementia Eugene un candidato doctoraal y docente di e departamento di Social Work and Development na Universidad di Aruba.

Sra. Clementia a presenta na mayornan e topico di amor propio y aceptacion propio como forma di cuido propio. A enfoca ariba formanan di cuido propio cu por tuma lugar den e duracion di un dia, y a ofrece conseho practico cu por aplica y incorpora den bo hogar, y transcurso di cumpli cu e diferente rolnan den un dia.

E seminario a clausura anunciando e felis ganador di e Voucher di Ling&Sons cu tabata un mayor participando den e webinar: Tina.FPNM ta gradici cada persona cu a forma parti na e seminario virtual aki, y ta spera cu mayornan por a haya herment y conseho valioso pa implementa den nan bida diario.