Bureau City Inspector: A huramenta tres funcionario cu ta autorisa pa duna boet

Recientemente Bureau City Inspector a huramenta tres funcionario como ‘Buitengewoon Agent van Politie’ trahando na Bureau City Inspector (BCI). Esaki ta nifica cu e personanan aki awo por duna boet na personanan cu ta tira sushi riba caya, of bandona cachonan. E tres persona ta trata, Miguel Wever, Roy Lacle, y Waldrick Willems.

Robby Rosel, PR di Bureau City Inspector, a splica cu nan tin e autoridad pa duna boet na esnan cu no ta mantene rond di nan luga limpi of ta tira sushi den mondi. Personanan cu ta doño di un cacho y ta neglisha of maltrata esaki, tambe por haya un boet. Pues tur locual cu tin di haber cu medio ambiente.

Pa e motibo aki, BCI ta haci apelacion na tur hende cu tin auto bieu riba caminda pa kita esaki, pasobra a cuminsa actua cu man duro entrante prome di juni. Ora cu kita auto, ta manda esaki pa Balashi y ta haya un boet. Robby Rosel a señala cu tin varios luga manera na Sabana Blanco, cu tin hopi auto riba caminda publico of acera.

Un otro tema di preocupacion ta e problema di cacho BCI ta bay traha cu Centro di Cacho. Nan ta preocupa pasobra tin rond di 40 mil cacho registra na Aruba cu ta riba caya. Ta pidi ciudadanonan pa tene comprension, pasobra ta un vehiculo nan tin y esaki por transporta solamente 10 pa dia. E cachonan recogi ta keda 10 dia na e centro y despues lo busca un doño p’e.