Fundacion Pa Nos Muchanan ta presenta: Ami tambe ta importante: Cuido propio pa por cuida un otro

Den cuadro cu e luna di mei cu ta luna internacional di famia, Fundacion Pa Nos Muchanan (FPNM) ta enfoca ariba e bienestar di nos mayornan. Un mayor ta experiencia diferente demandanan den diferente aspecto di su bida.

Segun estudionan haci, e nivel halto cu un mayor por experiencia di stress por tin varios consequencia negativo pa su mes y pa su famia. Pero estudio tambe ta demostra cu cuido propio ta un aspecto necesario pa implementa continuamente pa asina mehora e salud mental y emocional.

Pa e motibo aki FPNM ta organisa e seminario cu e titulo: “Ami tambe ta importante: Cuido propio pa por cuida un otro”, pa asina brinda nos mayornan y tur otro persona encarga cu e cuido di mucha informacion y formanan practico pa incorpora cuido propio.

Na momento cu un mayor su estado general ta bon e por ta un mihor mayor pa su yiu(nan) y brinda nan un miho cuido. Den transcurso di dia un mayor ta pone otro responsabilidadnan prome lubidando su mes.

Cu e seminario aki nos kier recorda mayornan cu “Abo” tambe ta importante y con pa tuma tempo pa bo mes mientras cu bo ta balansando otro responsabilidadnan.E seminario lo wordo duna na un forma diferente.

Mirando e medidanan pa cu e pandemia, e seminario lo wordo duna por medio di un ‘Webinar’ unda tur participante por sigui e programa via ‘Zoom. E seminario lo tuma lugar riba diasabra, 22 di mei 2021 di 9:00am te cu 1:30pm.

Durante e seminario lo tin diferente oradornan cu lo duna un presentacion relaciona cu e tema, entre otro;- “Maneho di Stress” duna pa Micheline Mathurin- “Balansa entre bida personal y bida professional” duna pa Rhomyko Winkelaar- “Salud mental di un mucha y nan ambiente” duna pa Misha Raymond-

“Mindful connecting parents with compassion & selfcare” duna pa Clementia EugeneE meta tras di cada topico ta pa duna hermentanan practico pa trata e diferente areanan di cuido propio caminda mayornan por aplica esaki y uza como guia den nan bida diario.

Nos ta invita tur persona cu ta interesa den e seminario aki pa registra uzando e link pa e registracion online riba e Facebook Page di Fundacion Pa Nos Muchanan. Pa mas informacion di e seminario por yama 588-0856/ 583-4247 of email na: info@fpnm.aw.