Cu presentacion interesante di Prof. Dr. Raymond Gradus, Presidente di CAft Na fin di luna di maart 2021, Aruba Trade and Industry Association (ATIA) a tene su reunion general di miembresia den un forma completamente virtual, pa asina sigura e bienestar di tur su miembronan y cumpliendo cu tur regla di DVG.
Prome cu e parti oficial, Prof. Dr. Raymond Gradus, presidente di hunta di College Aruba financieeltoezicht (CAft), a duna un presentacion interesante riba e tema di “Aruba and Sustainable Public Finance”.
Dr. Gradus a presenta e situacion economico di Aruba prome cu COVID-19, e status actual di Aruba su economia, e supervision financiero durante e crisis di COVID-19 y e perspectiva pa finansas publico sostenibel den futuro.
Dr. Gradus a conclui cu reforma den siguiente areanan ta absolutamente necesario pa Aruba: reduci gasto publico, un AOV/AWW sostenibel, reforma fiscal, un mercado laboral inclusivo (reforma laboral), modernizacion di e ‘business environment’ y diversificacion di economia di Aruba.
E presentacion a conduci na un discusion hopi dinamico y interesante entre miembronan presente. E presentacion completo di Dr. Gradus ta accesibel riba e website di CAft y e website di ATIA www.atiaruba.org, como tambe riba tur ATIA su rednan social.
Durante e reunion a presenta e resultadonan financiero di 2020 – 2021, e enfoke y metanan pricipal pa 2021 y alabes a eligi e miembronan di e hunta di directiva pa aña 2021 – 2022, y a presenta e Director nobo di ATIA.
Aña 2020 sigur tawata un aña cu hopi reto pa comercio di Aruba. Durante e reunion general, a duna un resumen di algun di e iniciativanan y tareanan di mas importante di ATIA den e aña cu ta tras di lomba.
Primordialmente, ATIA a percura pa lobby pa su miembronan, pero tambe pa comercio den su totalidad. Asina por menciona cu ATIA tawata envolvi den e realisacion di e sosten financiero di Afl. 4,000 pa cada kwartaal pa comerciantenan chikito y mediano, pero tambe sugeriendo continuamente con pa mehora y ahusta tal programa.
Tambe ATIA ta participa activamente den comunicacionnan cu ta referi na reforma fiscal, pa asina defende y proteha e bienestar di no solamente comercio pero tambe di Aruba su comunidad en general.
Ademas di e tema aki, ATIA tawata, y ta sigui ta, envolvi tambe entre otro den combersacionnan cu ta trata flexibilisacion di ley laboral por medio di e Dialogo Tripartite Social Laboral.
Finalmente, ATIA a forma parti di e taskforce pa Aruba su Masterplan “Repositioning our Sails” y tambe a sostene Gobierno di Aruba den deliberacionnan cu Hulanda pa logra fiansa pa likides, pero na mes momento vigilando e proceso di cerca pa sigura cu esaki ta uno transparente.
Tambe ATIA a sigui enfoca durante e aña riba desaroyo di e conocemento, habilidadnan y experticio di su miembronan y nan empleadonan por medio di suministro di diferente workshops, sesionnan di informacion y tambe eventonan pa engrandece e network di miembronan di ATIA.
Pa aña 2021 – 2022, e hunta di directiva a wordo reenforsa cu dos miembro nobo den persona di Sra. Gina Habibe y Sr. Andrew Harms. Na mes momento, ATIA a despedi di Sra. Mireille de Miranda y a gradicie pa su aporte valioso como tesorera di hunta di directiva di ATIA durante 2020-2021.
E hunta di directiva di ATIA pa 2021 – 2022 ta consisti di: Sr. Frank Snijders (Presidente), Sra. Gina Habibe (Vice-Presidente), Sr. Ronnie van Trigt (Tesorero), Sr. Tristan Every (Vice-Tesorero), Sr. Jurgen Benschop (Secretario), Sr. Tito de Cuba, Sra. Tisa LaSorte, Sr. Roland Croes, Sr. Donald de Veer, Sr. Matthijs Bijen y Sr. Andrew Harms.
E reunion a culmina cu e introduccion oficial di e Director nobo di ATIA, Sr. Herrick Henriquez kende a presenta e vision y strategia di ATIA pa e aña venidero y pa futuro.
ATIAAruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba.
E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org E presentacion completo di Dr. Gradus ta accesibel via e link aki: http://atiaruba.org/…/20210325-presentatie-ATIA-R…
Leave a Reply