Stichting ‘End Child Abuse’ a haci entrega na un carta na gobernador y parlamento

Stichting End Child Abuse ta haci entrega di un carta na gobernador di Aruba y na parlamento cu peticion urgente. E peticion riba nan carta ta pa tur parlamentario y minister pasa tres diferente tipo di screening.

Mijenou Tromp y Edwin Willems, ta forma parti di Stichting End Child Abuse y a presenta esaki na gobernador. Nan ta sinti cu gobierno a haci hopi promesa sinembargo no a cumpli cu nada.

Nan a trece dilanti cu e fundacion a organisa un demonstracion masal pa mustra nan mal contento riba e maneho y sistema na Aruba. Nan ta expresa cu a bin cu Social Crisis Plan a gasta 36 miyon pero no a trece ningun beneficio pa e muchanan.

No tin solucion pa e problematica di abuso di mucha, nan tin nan mesun pensamento riba pakico e tardansa pa bin cu solucion. Ta bisa cu nan proceso por keda stroba pa hende den posicion halto den gobierno y pa motibo a entrega e carta cerca gobernador.

Locual nan ta pidi p’e ta transparencia, integridad y solucionnan. Den e carta ta papia di e lucha pa derecho di mucha. A mustra situacion cu por a mira den ultimo añanan unda Minister, Parlamentario of Coordinadonan na diferente ministerio a haya nan mes den Corte pa acusacion di abuso sexual di mucha / menor di edad.

“Tin Politico cu den pasado a traha yiu cu muchanan menor di edad y nunca a wordo denuncia ya cu e mayornan a acepta of sconde e caso. Awendia e ta miembro di Parlamento manera nada no a pasa,” Mijenou Tromp a lesa e parti aki cu ta para den e carta pa Gobernador.

Cada parlamentario tin un funcion importante, e ta un representante di pueblo y ta masha importante pa nan ta integro, confiabel y tin un nivel di moralidad halto pa e funcionnan aki.

“Pa cambia leynan pa duna miho sentencia na abusadonan y miho yudansa na victimanan, pa elimina e posibilidad pa abusadonan drenta gobierno y podera di posicion importante y di poder”, Tromp a bisa.

Pa e motibonan ariba menciona y door cu ta den un proceso electoral aworaki, ta haya cu ta e momento pa tur minister y parlamentario pasa den un proceso di screening cu ta consisti di tres parti y di e forma aki por cuminsa papia di integridad. “Nos ta urgi Gobernador pa haci tur lo posibel pa para actonan di abuso sexual cu menornan.”