Sindicatonan kier keda envolvi y participacion di cualkier cambio cu gobierno tuma

Sra. Josephine Albertus, presidente di Sindicato SIMAR a bin dilanti pa papia riba e reunion cu a tene cu gobierno pa locual ta a veld di enseñanza mirando cu nan ‘no sa kico ta pasando y kico tin cu cambia’.

Nan kier claridad riba e veld di enseñanza cu ta prome cu covid-19 tabatin su retonan cune, por a mira cu prome cu pandemia e problema social tabata uno grandi, awo el a bira e dubbel.

Di parti di SIMAR a puntra gobierno kico ta haciendo of kico ta e plan pa duna sosten na famia cu ta pasando den duro, cu muchanan ta bin scol cu nan problema di cas y no tin trankilidad den area aki.

“Prome cu covid-19, e cantidad di problema na e prome aña escolar tabata 23% awo cu covid-19 el a bira 55% bay ariba. E ta un problema grandi. E situacion di cas mester ta sano sino e mucha ta bin cu tur su problema scol y ta afecta den su estudionan.”

SIMAR ta pidi cu kier ta mas envolvi y participa den e cambionan cu gobierno bin dilanti cune. Tambe kier sa kico gobierno su solucion ta riba e problemanan di asunto social pa asina e mucha por tin trankilidad na scol.

Tambe pa e motibo aki, sindicatonan SPA, SEPPA, SADA, SIMAR a yama un rueda di prensa na prome instante, pero mirando loke Prome Minister, Evelyn Wever-Croes a declara riba cortamento di salario, e sindicatonan no ta di acuerdo.

Esaki ta trece confusion cerca nan miembronan. Prome minister a bisa cu reunionnan tabata positivo cu sindicatonan. Tambe el a bisa cu gobierno a haci un apelacion pa entrega 12,6 porciento aña pasa y Hulanda a pone como un condicion hopi duro. Riba esaki e sindicatonan mester trece claridad y berdad. Segun e reunion cu a bay bon, sindicatonan no ta di acuerdo. “No a yega na ningun tipo di acuerdo.”

Tambe a tuma nota di e cortamento di 12,6 porciento riba salario. Segun Maduro, for di ora cu pandemia a cuminsa, ningun momento gobierno a acerca nan pa ta solidario. Gobierno a kita e 12,6% di e ambtenaarnan. “E prome minister no tabata sincero den esaki”, e ta bisa.

Tambe a menciona cu algun siman pasa cu Secretario di Estado Knops a bisa Eerste Kamer cu ta Aruba ta esun cu a propone esaki y no Hulanda. E ta bisa cu mester bin claridad for di gobierno den e asunto aki.